پارێزگاری هەولێر لەبارەی داخستنی پاڵاوگە نایاساییەکان دڵنیایی دەدات

ئاڤا نیوز

دووکەڵی پیسی پاڵاوگە نایاساییەکان، هەواو ژینگەی هەولێریان پیسکردووە، بەهۆیەوە دووکەڵێکی ڕەش بەشێکی ئاسمانی هەولێری داپۆشیوە و  بۆنێکی ناخۆشیش بڵاو دەکەنەوە.

وێنە گەورەکە: یەکێک لەو گلەییانەی بەردەوام دەکرێت پیسی ژینگەی هەولێرە، کاتێک بەیانیان لە شوێنێکی بەرز سەیری ئاسمانی شارەکە دەکەیت، چینێک دووکەڵی ڕەش دەبینیت شارەکەی تەنیوە، ئەمەش بە هۆکاری زۆربوونی شێرپەنجە و دەیان نەخۆشی دادەنرێت.

هۆکارە زانراوەکان: لە شاری هەولێر نزیکەی 150 پاڵاوگە هەیە، ژمارەیەکی زۆریان نایاسایین و مەرج و ڕێنماییە ژینگەیی و تەندروستییەکان پەیڕەو ناکەن، بەشێکیان کە ژمارەیان نزیکەی 60 پاڵاوگە دەبێت، لەناو پاڵاوگەکانیان پاڵاوگەی تریان بە نایاسایی دروست کردووە، ڕۆن و گاز و نەوتی خام بەقاچاخ دەبەن و بەبێ ڕەچاوکردنی هیچ شتێک دەیپاڵێون.

لێدوانی فەرمی: ئومێد خۆشناو پارێزگاری هەولێر ، لەبارەی کاتی دروستکردن و مۆڵەتی ئەو پاڵاوگانە، بە ئاڤا میدیای گوت:

٠ ئەم پاڵاوگانە لە ساڵانی 2006 و ساڵانی دواتر دروستکراون، ئێستاش حەملەیەکی جددییان دەستپێکردووە بۆ داخستنیان.

٠ تەحەدا دەکەم لەم کابینەیەی حکومەت یەک پاڵاوگەی نایاسایی کرابێتەوە و هەموویان پێشتر دروستکراون.

٠ بەهیچ شێوەیەک ناچینە ژێر گوشاری هیچ بەرپرسێک، ئەمە مەسەلەیەکە پەیوەندی بە ژیان و تەندروستی خەڵکی هەولێرەوە هەیە.

ئەوەش بزانە: ئەو پاڵاوگانەی کە ئێستا ژینگەی هەولێر پیس دەکەن، بڕیاری سەرۆکوەزیران مەسرور بارزانی هەیە دابخرێن.

باکگراوند: ماوەیەکە هەڵمەتی داخستنی پاڵاوگەکان دەستیپێکردووە و تاوەکو ئێستا زیاتر لە 40 پاڵاوگەیان داخراون، بەهۆی سەرپێچیکردنیش ژمارەیەک لە خاوەن پاڵاوگەکان دەستگیرکراون.