چوار ئامێری پەیوەست بە گۆڕانکاری ئاووهەوا لە هەولێر جێگیر دەکرێن

ئاڤا نیوز 

 

حکومەتی هەرێمی کوردستان لە درێژەی هەنگاوەکانی بۆ ڕووبەڕووبوونەوەی ئاڵنگارییەکانی ئاووهەوا، فەرمانگەیەکی پەیوەست بەو پرسەی کردووەتەوە و نوێنەری سەرجەم پارێزگا و ئیدارە سەربەخۆیەکان لەو فەرمانگەیە کاردەکەن و هەنگاوەکانیان بۆ پێشگرتن لەسەر کاریگەرییەکان چڕکردووەتەوە.

 

وێنە گەورەکە: ڕووبەڕووبوونەوەی ئاڵنگارییەکانی بەردەم گۆڕانی ئاووهەوا لە جیهان پرسێکی گەرمە بە ملیۆنان دۆلار بۆ ڕێگەگرتن لە تەشەنەی کاریگەرییەکانی تەرخان کراوە، بەتایبەت لەو وڵاتانەی کە لەنێو زۆنی سووری مەترسیدان و کاریگەرییەکە بە فراوانی دەیانگرێتەوە. کابینەی نۆیەمی حکومەتی هەرێمی کوردستان هەنگاوی ئەرێنی بۆ ڕووبەڕووبوونەوەی ئەو ئاڵنگارییانە ناوە.

 

لێدوانی فەرمی: هەڤاڵ ئەحمەد، بەڕێوبەری فەرمانگەی گۆڕانی کەشوهەوا لە هەرێمی کوردستان بە ئاڤا نیوزی گوت، "ڕەزامەندی وەرگیراوە لەسەر دابینکردنی چوار ئامێر کە سێیان جێگیرن و تایبەتمەندن بە زانینی خوێندنەوەی ڕێژەی گازە زیانبەخشەکانی لەسەر ژینگەی هەرێمی کوردستان و کارئاسانی بۆ پۆلێنکردنی ڕێژەی پیسییەکەی، لە ساڵی نوێ جێگیر دەکرێن".

 

ئەوەی پێویستە بیزانیت: ئامێرەکان کوالێتی و ڕێژەی پیسبوونی هەوا لە پارێزگاکانی هەرێمی کوردستان دیاری دەکات، ئاستی ئەم گازانە (ئۆزۆن، So2، PM10، CO، No2 و Pm2o5) دەخوێنێتەوە ڕێژەی کاریگەریان لەسەر ژینگە دیاری دەکات.