زیاتر لە 16 ملیۆن دار لە عێراق دەچێنرێن

ئاڤا نیوز

 

لە چوارچێوەی هەوڵەکان بۆ ڕووبەڕووبوونەوەی گۆڕانکارییەکانی ژینگە و لە سێ دەستپێشخەریدا، زیاتر لە 16 ملیۆن دار لە بەغدا و پارێزگاکانی دیکەی عێراق چێنراون.

 

ئەوەی پێویستە بیزانیت: وەک شارەزایان باسی دەکەن، عێراق وەک سەرەتایەک بۆ  ڕووبەڕووبوونەوەی گۆڕانکارییەکانی ژینگە پێویستی بەوە هەبووە 15 ملیۆن دار بچێنێت، بەوپێیەش هەڵمەتەکەی حکومەت ئەو ژمارەیەی تێپەڕاندووە و ملیۆنێک داریش زیاتر چێنراوە.

 

ڕاگەیێنراوی فەرمی: محەممەد ئەلخوزاعی، وتەبێژی وەزارەتی کشتوکاڵی فیدراڵی بە ئاژانسی فەرمی عێراقی ڕاگەیاندووە، لەو سێ هەڵمەتەدا 16 ملیۆن و 452 هەزار دار لە جۆرەکانی دارخورما، زەیتون، جۆرەکانی درەختی میوەی بەرهەمدار، کالیپتوس و درەختی گوڵدار بۆ مەبەستی ڕازاندنەوە چێنراون.

 

بەگوتەی وەزارەتی کشتوکاڵ هەڵمەتەکان لە مانگەکانی ئەیلوول و تشرینی یەکەم و لەماوەیەکی پێوانەییدا ئەنجامدراون، پرۆسەکەش گشتگیربووە و هەموو ناوچەکانی گرتووەتەوە، ئامانجیش لێی ڕووبەڕووبوونەوەی کاریگەرییەکانی گۆڕانی ژینگە بووە.