شەش ڕاسپاردە لە فەرماندەی گشتیی هێزە چەکدارەکانی عێراقەوە لەبارەی ئەگەری هێرشی ئیسرائیل

ئاڤا نیوز

 

فەرماندەی گشتی هێزە چەکدارەکانی عێراق ژمارەیەک ڕاسپاردە ئاراستەی سەرجەم دەزگا ئەمنییەکانی وڵات دەکات بۆ گرتنەبەری ڕێکاری ئەمنی، لە سەرووی هەمووشیانەوە ڕێگریکردن لە هەر چالاکییەکی سەربازی لە دەرەوەی چوارچێوەی کۆنترۆڵی دەوڵەت.

 

وێنە گەوەرەکە: دوای کۆبوونەوەی ئەنجوومەنی وەزیرانی عێراق لەسەر هەڕەشەکانی ئیسرائیل بۆسەر ئەو وڵاتە، محەممەد شیاع سوودانی داوای کۆبوونەوەیەکی بەپەلەی ئەنجوومەنی وەزاری بۆ ئاسایشی نیشتمانی کرد.

 

چیرۆکی سەرەکی: سێشەممە 19-11-2024، سەرۆکوەزیران و فەرماندەی گشتی هێزە چەکدارەکان محەممەد شیاع سوودانی سەرپەرشتی کۆبوونەوەیەکی بەپەلەی ئەنجوومەنی وەزاریی بۆ ئاسایشی نیشتیمانی کرد، لە میانی کۆبوونەوەکەدا پێشهاتەکانی دۆخی ئەمنی لە ئاستی ناوچەیی و نێودەوڵەتی باس کران.

 

ڕاگەیێنراوی فەرمی: نووسینگەی سەرۆکوەزیرانی عێراق ڕایگەیاند لەسەر زاری یەحیا ڕەسوڵ، گوتەبێژی فەرماندەی گشتی هێزە چەکدارەکانی عێراق ڕایگەیاند: لە میانی کۆبوونەوەکەدا ئەنجوومەنی وەزاریی بۆ ئاسایشی نیشتمانی پێداگری لەسەر ڕەتکردنەوەی ئەو سکاڵایە کردەوە کە لە لایەن ئیسرائیلەوە ئاراستەی عێراق کراوە، جەختی لەوە کردەوە کە ئەم تۆمەتانە لە بیانوویەک زیاتر هیچی تر نین و ئامانج لێی ڕەوایەتیدانە بە دەستدرێژییەکی پلان بۆ داڕێژراو بۆ سەر عێراق.

 

زانیاریی زیاتر: هەر بەپێی ڕاگەیێنراوەکە، عێراق پابەندبوونی خۆی بە یاسا نێودەوڵەتییەکان و جاڕنامەی نەتەوە یەکگرتووەکان دووپاتدەکاتەوە، هاوکات بە تووندی ئیدانەی هەڕەشەکانی ئیسرائیل دەکات، کە ئامانج لێی ناسەقامگیرکردنی ناوچەکەیە، داواش لە هەموو ئەکتەرەکان دەکات ئەو پەرەسەندنە ڕەتبکەنەوە و پێشینە بدەن بە گفتوگۆ و پابەندبوون بە پرەنسیپەکان لە یاسای نێودەوڵەتی.

 

لەبەر ڕۆشنایی ئەم پێشهاتانە ئەنجوومەنی وەزاری بۆ ئاسایشی نیشتمانی ئەمانەی خوارەوەی پەسەند کرد:

 

1- ئاڕاستەکردنی وەزارەتی دەرەوە بۆ بەدواداچوون بۆ ئەو دۆسیەیە لە نەتەوە یەکگرتووەکان و کۆڕبەندە نێودەوڵەتییەکان و ئۆرگانەکانی نەتەوە یەکگرتووەکان و گرتنەبەری هەموو هەنگاوێکی پێویست، بەگوێرەی بنەماو یاسا نێودەوڵەتییەکان، بۆ پاراستنی مافەکانی عێراق و ڕێگریکردن لە هەڕەشە شەڕانگێزەکانی ئیسرائیل

2- داوا لە کۆمکاری وڵاتانی عەرەبی دەکەین بۆ وەرگرتنی هەڵوێستی پتەو و یەکگرتوو لە بەرامبەر هەڕەشەکانی ئیسرائی، لەوانەش ڕێوشوێنی پراکتیکی لەسەر بنەمای یەکخستنی چارەنووس و بەرگری هاوبەش.

3- داوا لە ئەنجوومەنی ئاسایشی نێودەوڵەتی دەکەین چاو بەو سکاڵایانەی بخشێنێتەوەکە کۆماری عێراق پێشکەشی کردووە (سکاڵای ژمارە ABM/1/185 لە ڕێککەوتی 14-8-2024 و ئەو سکاڵایانەی لە مانگی تشرینی یەکەمی 2024 پێشکەش کراون)، دژی دەسەڵاتدارانی ئیسرائیل، و گرتنەبەری ڕێوشوێنی خۆپارێزی بۆ دڵنیابوون لە بەدەستهێنانی سەقامگیری و ئاشتی ناوچەیی و نێودەوڵەتی.

4- داوا لە ئەنجوومەنی ئاسایشی نێودەوڵەتی بکرێت بۆ گرتنەبەری ڕێوشوێنی خێرا و ڕێگریکردن بەرامبەر بە ئیسرائیل، هاوکات کارکردن بۆ لێپرسینەوەیان لە پێشێلکردنی یاسا نێودەوڵەتییەکان و بڕیارنامەکانی ئەنجوومەنی ئاسایشی نێودەوڵەتی.

5- دەرکردنی بڕیارنامەیەک لە چوارچێوەی بەندی حەوتەم بۆ ئاگربەستی دەستبەجێ لە سەرتاسەری ناوچەکە و وەستاندنی کارە دوژمنکارییەکان، و ڕێگریکردن لە هەر لایەنێک لە دەستپێکردنی کردەوەی شەڕانگێزی یان پاساودانی لە ڕێگەی تۆمەتی درۆوە.

6- ویلایەتە یەکگرتوەکانی ئەمریکا لەگەڵ عێراق لە ڕێگەی گفتوگۆی ئەمنی و سەربازی لە چوارچێوەی بەشی سێیەمی ڕێککەوتنی چوارچێوەی ستراتیژی، هەنگاوی کاریگەر بنێن بۆ ڕێگریکردن لە ئیسرائیل، هاوکات داوا لە هاوپەیمانی نێودەوڵەتی و ئەندامەکانی دەکات سنوورێک بۆ ئەم هەڕەشانە و فراوانبوونی شەڕەکە دابنێن.

 

لەلایەكی دیكەوه: فەرماندەی گشتی هێزە چەکدارەکان ژمارەیەک ڕاسپاردەی ئاراستەی سەرجەم هێزە ئەمنییەکان کرد بۆ گرتنەبەری ڕێکاری ئەمنی، لەوانە:

 

1-  هێزە چەکدارەکانمان و سەرجەم دەزگا ئەمنییەکان ڕێگری بکەن و لێپێچینەوە لە هەر چالاکیەکی سەربازی لە دەرەوەی چوارچێوەی کۆنترۆڵی دەوڵەت بکەن.
2- وەزارەتی ناوخۆ ئەو ڕێنمایانەی لە کۆبوونەوەکانی پێشوو دەرچووە چالاک دەکات، پلانی فریاگوزاری بەگوێرەی قەبارەی هەڕەشەکان ئامادە دەکات، هەروەها دڵنیایی دەدات لە خۆپارێزی تەواو بۆ پێداویستییە ئەمنییەکان.
3 - بەهێزکردنی سنووری ڕۆژئاوای عێراق لە ڕێگەی چالاکی چڕ و جێگیرکردنی خێرا و پەرەپێدانی پلانی پێویست و کارکردن بۆ دروستکردن و دەستەبەرکردنی قووڵایی ئەمنی کاریگەر.
4 - فەرماندەیی بەرگری ئاسمانی پێداویستییەکانی پاراستنی ئاسمانی بۆ ئاسمانی عێراق مسۆگەر دەکات، هەروەها بۆ ئامانجە گرنگ و کاریگەر و گرنگەکان لە ناوخۆدا.
5- فەرماندە مەیدانییەکان بەرپرسیارێتی هەر پێشێلکارییەکی ئەمنی لە چوارچێوەی بەرپرسیارێتیدا هەڵدەگرن کە دەتوانێت ئاسایشی وڵات بخاتە مەترسییەوە.
6- دەزگای هەواڵگری هەستێت بە شیکاری و چاودێری و بەدواداچوون بۆ هەر چالاکیەکی ئاسمانی دوژمنکارانە و پێشکەشکردنی ڕاپۆرتی هەواڵگری دەستبەجێ لەسەر هەموو ئەو شتانەی دەکەوێتە چوارچێوەی کار و تایبەتمەندی هەواڵگرییان.

 

ئەوەی پێویستە بیزانیت: ئیسرائیل سکاڵانامەیەکی بۆ ئەنجوومەنی ئاسایشی نێودەوڵەتی ناردووە بۆ یەکەمجار ناوی هێزە چەکدارەکانی عێراق دەهێنێت و تۆمەتباریان دەکات بەوەی هێرشی کوشندەیان کردووەتە سەر ئیسرائیل و بووەتە هۆی کوژرانی سەربازەکانی.

 

لێدوانی فەرمی: جەدعوون ساعر، وەزیری دەرەوەی ئیسرائیل داوا دەکات ئەم نامەیە وەک بەڵگەنامەیەکی فەرمی لە ئەنجوومەنی ئاسایشدا بڵاوبکرێتەوە، دەشڵێت: "ئیسرائیل مافی خۆیەتی وەڵام بداتەوە و هەموو ڕێوشوێنێکی پێویست بگرێتەبەر بۆ پاراستنی سەر و ماڵی هاووڵاتییانی".