لە سووریا کورد لە پێناو پاراستنی زمانەکەی دەجەنگێت

ئاڤا نیوز

 

دۆخی کورد و زمانی کوردی لە سووریا لە مەترسیدایە و تاوەکو ئێستاش لە هیچ دام و دەزگایەکی حکومی " دان بە زمانی کوردی" نانرێت.

 

لە کاتێکدا نەتەوەی کورد و زمانی کوردی هاوشانی زمانی عەرەب لە سووریا هەن، بەڵام لە وڵاتە جگە لە زمانی عەرەبی، " بۆ قسەکردن، نووسین و خوێندن"ڕێگە بە بەکارهێنانی هیچ زمانێکی دیکە نادرێت.

 

 حەسەن محەمەد سەعید، مامۆستای زانکۆ لە رۆژئاوای کوردستان بۆ ئاڤا میدیا گوتی: دۆخی زمانی کوردی لە سووریا لە مەترسیدایە، تاوەکو ئێستاش هیچ دەزگایەکی حکومی و پەروەردەیی و تەنانەت لەو راگەیاندنانەی زمانی کوردیش بەکاردێنن '" دان بە زمانی کوردی" نانرێت.

 

حەسەن دەڵێت: گەر دۆخی زمانی کوردی بەم شێوەیە بەردەوام بێت، ئەوا دۆخی کوردەکان  هاوشێوەی کەمینەکان وەک ( ئاشووری، ئێزدی و کەمینەکانی دیکەی سووریا)ـی لێدێت، کە ژمارەیان لە سەدان کەس تێناپەڕێت.

 

دۆخی زمانی کوردی پەیوەستە بە "دۆخی کوردەوە" لە سووریا، بەهۆی  دۆخە سیاسی و سەربازیەکەی رۆژئاوای کوردستان لەو وڵاتە دۆخی کورد جێگیر نییە.

 

معاز یوسف، نووسەر و بلۆگەری مافی مرۆڤ لە زمانی عەرەبی و کوردیدا دەڵێت، ئەمە دەگەڕێتەوە بۆ (نەبوونی دانپێدانانی دەستووری، زەوتکردنی مافە زمانییەکانی کورد لە بواری پەروەردە، میدیا، زمانی بلۆگکردن و نامەی فەرمی، و بەردەوامی سیاسەتی نکۆڵیکردن لە فرەیی زمانەوانی و کورد ).

 

لەلایەکی دیکەوە: بەرفین عەبدولقادر مامۆستای زمانی کوردی لە قوتابخانەیەکی رۆژئاوای کوردستان بۆ ئاڤا گوتی: لە قوتابخانەیەکی "ئیدارەی سەربەخۆی" رۆژئاوای کوردستان هەر پێکهاتەیەک بە زمانی خۆی دەخوێنێت.  کە لە کورد و عەرەب و سریانی پێک دێن.

 

سەڕەڕای هەوڵە بەردەوامەکانی پارتە کوردییەکانی سوریا بۆ پەرەپێدانی زمانی کوردی بەتایبەت لە قوتابخانەکانی شارە کوردییەکانی رۆژئاوای کوردستان. تاوەکو ئێستاش تەنیا زمانی عەرەبی لە سەرجەم دەزگا کارگێڕی و پەروەردەییەکانی سووریا بەکاردەهێنرێت.

 

نووسەران و مافەوانانی زمان دەڵێن: جێگیرکردنی زمانی کوردی لە ڕێگەی پڕۆگرامی قوتابخانەکان و زانکۆکان. وادەکات دانپێدانانی زمانی کوردی بە پایەکانی دیکەی دەزگاکانی دەوڵەت بەرزببێتەوە.