لە قەلادزێ ‎ دەرچوویێکی زانکۆ هەلی کار بۆ چەندین کچ دەڕەخسێنێت

ئاڤا دیجیتاڵ

 

دوای تەواوکردنی خوێندن بۆ دەستکەوتنی کار، هێڤی نەبوونی دامەزراندنی لە کەرتی گشتی نەکردە بیانوو و لە کارگەیەکی کەرتی تایبەت هەوڵی فێربوونی پیشە و ئەزموونێکی نوێی دا.

 

‎ئەوکاتەی دەستیپێکرد شارەزاییەکی ئەوتۆی لە پیشە نوێیەکەیدا نەبوو، بەڵام ئێستا یەکێكە لە بەرگدرووە دەستڕەنگینەکان.

 

‎ هێڤی خدر، کارمەندی کارگەیەکی کەرتی تایبەتە و دەڵێت: ماوەی چوار ساڵە خوێندنم تەواو کردووە، دەرچووی بەشی کارگێڕی کارم و لە یەکەمەکانی بەشەکەی خۆم بووم، بەڵام بەهۆی کەمی هەلی دامەزراندنەوە لە کەرتی گشتی وەرنەگیرام.

 

‎هێڤی خدر گوتی: لە کاتی پێشنیازیکردنی ئەو کارە، ئەزموونێکی باشم نەبوو لە کاری بەرگدووری، بەڵام بەهۆی ئەوەی خولی ئەکادیمیم لە کارگەی کەما وەرگرت بۆ ماوەی سێ مانگ، دواتر لێرە وەرگیرام و بووم بە کارمەندی کارگەکە، فێربوونی پیشەکە گرنگە و لەگەڵ ئەوەشدا داهاتێکە کە بتوانم بۆ خۆم پاشەکەوتی لێ بکەم و سوودی لێ ببینم.

 

‎کۆسرەت خاوەنی کارگەی کەما، ئەو ڕۆژەی بڕوانامەی زانکۆی بەدەستهێنا بڕیاری دا پرۆژەیەک دابمەزرێنێت کە هەم خۆی هەم کەسانی دیکەش سوودی لێ وەربگرن،  کۆسرەت خەسرەو ـ خاوەنی کارگەکە باسی ئەوکاتە دەکات و دەڵێت: ماوەی چوار ساڵە خوێندنم تەواو کردووە، دەرچووی بەشی فیزیام لە زانکۆی ڕاپەڕین، دوای ئەوەی کە خوێندنم تەواو کرد بیرم لەوە نەکردەوە کە دابمەزرێم، بیرم لەوە کردەوە کە هەلی کار بۆ خۆم و لەگەڵ ئەوەشدا بۆ دەوروبەرم بڕەخسێنم، خۆشبەختانە بیرمان لەوە کردەوە کە کارگەیەکی جلوبەرگ بکەینەوە، بەوپێیەی کە کارگەی جلوبەرگ لە هەرێمی کوردستان زۆر کەمە، کارگەیەکی جلوبەرگمان دانا کە هەلی کاری بۆ پانزە ژنی سنووری قەڵادزێ ڕەخساند. 

 

خاوەنی کارگەکە دەڵێت: گەنجان بیر لە دامەزراندن نەکەنەوە، بەڵکو لەبری ئەوە بیر لە ئیشێکی سەربەخۆی خۆیان هەبێت، هەروەها دەبێت حکومەتیش یارمەتی کەرتی تایبەت بدات بۆ زیاتر بەرەوپێشبردنی. 

 

‎ئێستا لە کارگەکەی کۆسرەتدا 15 خانمی سنووری ئیدارەی ڕاپەڕین خاوەن کارن و ڕۆژانە بە دەسترەنگینی خۆیان ئەو پۆشاکانە دەدوورن کە بەناو و لۆگۆی براندێکی کوردییەوە دەخرێنە بازاڕەوە.

 

‎ خونچە ڕەسووڵ، کارمەندی کارگەکە ئاماژەی بەوە دا کە "مەرج نییە دوای ئەوەی کە خوێندنت تەواو کرد، یان لەهەمان ئەو بوارەی کە خوێندووتە کار بکەی، دەتوانی پشت بە کەرتی تایبەت ببەستی و هەلی کارت دەستبکەوێت، ئەمەش یارمەتیدەر دەبێت بۆ گەنجانمان".

 

‎جلوبەرگەکانی کارگەکە جۆراوجۆرن، بەپێی داواکاری و وەرزەکانیش دەگۆڕێن، بەرهەکانی پۆشاکی خانمانن و ساڵانە 24 هەزار پارچە لە کارگەکە دروست دەکرێن، لە بازاڕی هەرێمی کوردستان و عێراقدا ساغ دەکرێنەوە.