ڕێکخراوێک نهێنییەکانی ژووری سێدارە لە عێراق ئاشکرا دەکات

ئاڤا نیوز 

تەنیا لە مانگی ئەیلوولی ئەمساڵ لە ناوەندی زیندانی ناسریە، تەرمی لایەنی کەم 50 زیندانی دوای لەسێدارەدانیان ڕادەستی خانەوادەکانیان کراونەتەوە. ڕێکخراوێکی تایبەت بە مافەکانی مرۆڤ بەرپرسیارێتی ئەو لەسێدارەدانانە دەخاتە ئەستۆی سەرۆککۆماری عێراق.

چیرۆکی سەرەکی: ڕوانگەی "ئافاد" ڕێکخراوێکی ڕاگەیاندنی مافی مرۆڤە و تیشک دەخاتە سەر پێشێلکارییەکان دژ بە مافەکانی مرۆڤ لە عێراق، لە ڕاگەیێنراوێکیشدا پێشێلکارییەکان لە زیندانەکانی عێراق ئاشکرا دەکات.

ڕاگەیێنراوی فەرمی: بەپێی ڕاپۆرتەکەی "ئافاد"، لە مانگی نۆی ئەمساڵ چوار جار پرۆسەی بەکۆمەڵی لەسێدارەدان لە ناوەندی زیندانی ناسریە جێبەجێکراوە، دواهەمینیان 24ی مانگی ڕابردوو بووە و 21 زیندانی لە بەرەبەیان بانگکراون و سزای لەسێدارەدانیان بەسەردا جێبەجێکراوە.

شێوازی جێبەجێکردن: بەپێی ئەو لێکۆڵینەوانەی ڕوانگەی ئافاد کردوویەتی، زیندانییەکان بە جلی نووستنەوە لەکاتی نوێژی بەیانی ڕاپێچی ژووری سێدارە کراون، تەنانەت ڕێگەیان پێنەدراوە نوێژ بکەن یان وەسیەتنامەیەک لەدوای خۆیان بەجێبهێڵن. هەرجارە و شەش کەسیان بردووەتە ژێر پەتی سێدارە و لەسێدارەیان داون. لە هەندێک کاتیشدا لەکاتی جێبەجێکردنی لەسێدارەدانەکان دروشمی تائیفیان بەرامبەر بەکارهێناون.

زانیاریی بەدەستهاتوو: ڕوانگەکە لە زاری کارمەندێکی زیندانی ناسریە بڵاوی کردووەتەوە "تەرمی زیندانییەکان ڕۆژی دواتر لە بەشی پزیشکی یاساییەوە ڕادەستی خانەوادەکانیان کراون، کەسوکارەکانیان ئاگادارکراونەتەوە بەتانییەک لەگەڵ خۆیان ببەن، هەروەها لەبەرامبەر پێدانی وەفاتنامە پارەیان لێوەرگرتوون".

هۆکارە زانراوەکان: بەگوێرەی ڕاپۆرتەکە، لێکۆڵینەوەکان ئەوەیان دەرخستووە "عەبدوللـەتیف ڕەشید، سەرۆککۆماری عێراق لەسەر بنەمای ڕاسپاردە و فشاری سیاسی لایەنە تائیفییەکانی ناو بەغدا کە هەندێکیان سەر بە گرووپە چەکدارەکانن، واژۆی لەسەر لەسێدارەدانی دەستگیرکراوەکان کردووە، سەرەڕای بوونی بەڵگە و سکاڵا لەلایەن دەستگیرکراوەکانەوە کە ئەشکەنجە دراون، بەڵام لەژێر فشاردا زانیاری وەرگیراوە و کاغەزی پێشوەختیان واژۆ کردووە".

ئەوەی لەوبارەیەوە دەگوترێت: بەگوێرەی ڕاپۆرتەکە، زۆربەی قوربانییەکان خەڵکی پارێزگاکانی سەلاحەددین، دیالە، ئەنبار، بەغدا، نەینەوا و بابلن، هەندێک لەو قوربانیانەی لەسێدارەدراون دەگەڕێنەوە بۆ سەردەمی حکومەتی نووری مالیکی کە ئەوکات بە سەردەمی تۆڵەسەندنەوە و تایەفەگەری ناسرابوو.

زانیاریی زیاتر: هەر بەگوێرەی زانیارییەکانی ڕوانگەی "ئافاد"، لەنێو ئەو کەسانەی لەسێدارەدراون، دەستگیرکراوێکیان تەمەنی 68 ساڵ بووە بە ناوی موحسین عەزاب عەجیل، دانیشتووی تکریت و خاوەن پێنج کچ بووە، بنەماڵەی قوربانییەکە ڕاپۆرتی پزیشکی و گەواهییان پێشکەش کردووە، پشتڕاستیان کردووەتەوە ئەشکەنجەی جۆراوجۆر دراوە و بەبێ خوێندنەوەی ناوەڕۆکی نووسراوەکە ڕاپۆرتی لێکۆڵینەوەی واژۆ کردووە.

کاریگەری و لێکەوتەکان: ڕوانگەی ئافاد سەرۆککۆماری عێراق بە بەرپرسیار دەزانێت و پرۆسەکە وەک کۆمەڵکوژی ناودەبات لە ماوەی سەرۆکایەتی عەبدوللـەتیف ڕەشید، ئەمە جیا لە پشتگوێخستنی بانگەوازی ڕێکخراوەکانی مافی مرۆڤ و ڕێکخراوە مرۆیی و ڕێکخراوە ناوخۆییە تایبەتەکانی دیکە، کە لەمبارەیەوە لەسێدارەدانی دەیان کەسی بێتاوانیان پشتڕاست کردووەتەو لەماوەی حکومڕانی د.عەبدوللـەتیف ڕەشید لە دوو ساڵی ڕابردوودا.