د سالا 2023ـێ دا 41 هزار و 309 دار ل پارێزگەها دهۆکێ هاتنە چاندن

ئاڤا دیجیتاڵ 

 

"د سالا 2023ـێ دا 41 هزار و 309 دار ل پارێزگەها دهۆکێ هاتنە چاندن، ئەڤە ژی بوویە ئەگەرێ کێمبوونا مەترسیان لسەر  پیسبوونا هه‌وای". كاوه سەبری فارس، رێڤەبەرێ دارستان و پاوانان ل دهۆکێ ئەڤە بۆ ئاڤا میدیا گوت. 

 

"مەترسیا پیسبوونا ژینگەهێ ژ جگارەکێشانێ مەزنترە" 

 

ل دویڤ ڤەکۆلینەکا په‌یمانگه‌ها سیاسه‌تێن تێهنێ ل زانكۆیا شیكاگۆ، مەترسیا پیسبوونا هه‌وایى ل سه‌ر ساخله‌میا مرۆڤى ژ زەرەرێن  ڤه‌خارنێن كحوولى و جگاره‌كێشانێ مه‌زنتره. 

 

"ل دهۆکێ هندەک کارگەهێن مەترسیدار هەنە"

 

"پارێزگەها دهۆکێ هژمارەکا کارگەهان هەنە، ب تایبەتی کارگەهێن دەڤەرا کاشێ، نوکە بەشەکا وان کارگەهان ب شێوەیەکێ باش شولێن خۆ دکەن و ژینگەهێ پیس ناکەن، لێ هێشتا هژمارەکا وان کارگەهان د دەمێ کارپێکرنێ دا زەرەران دگەهینە ژینگەهێ، وەک رێڤەبەریا ژینگەها دهۆکێ مە رێکارێن یاسایی هەنە دژی وان کارگەهان کو دبنە ئەگەرێ پیسبوونا ژینگەهـ و هەوایی، گەلەک جارا وان سزادەدەین ب پارەی و هندەک جاران رووبڕووی دادگەهی دکەین، مە تیمێن تایبەتێن هەین بۆ دیڤچوونا ژینگەهێ و پسبوونا ژینگەهێ ب بەردەوامی". دلشاد عەبدولڕەحمان رێڤەبەرێ فەرمانگەها ژینگەها پارێزگەها دهۆکێ بۆ ئاڤا میدیا ئەڤە گوت.

 

موەلیدە ژینگەهێ پیس دکەن؟

 

"ئەم دیڤچوونەکا تەمام لسەر ئەگەرێن پیسبونا ژینگە و هەوایی دکەین، وەکو مولیدەیێن کارەبێ ئەوێن گەلەک دوکەلێ چێدکەن ئانکۆ ئەوێن گەلەک بەرمایکێن گازی درێژن، ئەم رێکارێن یاسایی دگرینە". رێڤەبەرێ ژینگەهێ دیارکر.

 

چاندنا نەمام و داران پشکدارن ل چارەسەرکرنا قەیرانا ژینگە و هەوای؟

 

گەلەک کەس وەسا هزر دکەن کو چاندنا دار و نەمامان گەلەک کاریگەری ل سەر رەوشا هەوای و ژینەگەهێ هەیە، لێ رەنگە چاندنا ملیارەها نەمام و داران بەس نەبن بۆ رزگارکرنا هەوای و ژینگەهێ ژ پیساتیێ، لێ ئەگەرا  سەرەکیا چاندنێ ئەوە کۆ دووانە ئۆکسیدا کاربوونێ د هەوای دا رادکێشیت.

ل دیڤ راپۆرتەکا دۆیچە ڤێلێی یا ئەڵمانی، سالانە دارستانێن جیهانێ نزیکی 16 ملیار تۆن دەوانە ئۆکسیدا کاربۆنێ دکێشنەڤە، کۆ رێژەیا گشتییا دوانە ئۆکسیدا کاربۆن ل وەڵاتێن ئەورۆپی سێ جارکی هندەیە.

ل دەڤ حوکمەتێن جیهانێ، د بزاڤەکێ دا بۆ کێمکرنا ئەو زەرەرێن کۆ ل ئەگەرا برینا داران چێدبن ل سالێن دەرباز بوویی دا چەندین دەستپێشخەری چێبوونە کو ئارمانجا وان چاندنا ملیارەها نەمامانە.

 

زانیاری.. ل چار سالێن کابینەیا نەهیا حوکمەتا هەرێما کوردستانێ، رێژەیا کەسکاتیێ پێشەنگە و گەلەک گرنگی ب وی بابەتی دهێنە دان و بودجەیەکا باش بۆ هاتیە تەرخانکرن کو بەری پشت بەستنێ لسەرهاوردەکرنا گول و داران ل دەرڤە بۆ ناڤ هەریما کوردستانێ بهێتەکرن، ل نەمامگەهێن هەرێما کوردستانێ شیانە داهاتەکێ مەزن ڤەگەرینن بۆ خەزێنەیا دەولەتێ و حوکمەت پشت ب بەرهەمێن خۆمالی ببەستیت.