لە حکومەتەوە بۆ مووچەخۆران: ساڵی داهاتوو ناردنی مووچە لەلایەن بەغدا بەردەوام دەبێت

ئاڤا نیوز 

 

بەپێی هەردوو ڕێككەوتنی هەولێر و بەغدا، تاوەكو سەری ساڵ مووچە لەلایەن بەغدا دەنێردرێت، تاوەکو ئەوکات سەرجەم گرفتەكانی لیستی مووچە چارەسەر دەکرێن و ساڵی داهاتووش ناردنی مووچە بەردەوام دەبێت.

وێنە گەورەكە: حکومەتی هەرێمی كوردستان و حکومەتی عێراق لە گفتوگۆكردن بۆ چارەسەركردنی گرفتی مووچە بەردەوام دەبن، ئەم هەفتەیە شاندێکی هەرێمی كوردستان دەچێتە بەغدا و لە ماوەی دوو ڕۆژدا گفتوگۆ لەبارەی گرفتەکانی لیستی مووچە دەکەن.

لێدوانی فەرمی: د. ئومێد سەباح، سەرۆکی دیوانی ئەنجوومەنی وەزیرانی هەرێمی کوردستان،  لە لێدوانێکی تایبەت بۆ ئاڤا نیوز ڕایگەیاند: ئەم ڕێككەوتنەی كە هەردوو ئەنجوومەنی ئابووریی هەرێمی كوردستان و عێراق دەنگمان لەسەری دا، لە ئەنجوومەنی وەزیرانی عێراقیش بڕیاری لەسەر درا، وەزارەتی دارایی عێراقی پابەند كردووە كە دەبێت مووچە بنێرێت.

زانیاریی زیاتر: وەک د. ئومێد سەباح باسی کرد، لە ئێستاوە تاوەكو سەری ساڵ بوار لەبەردەم هەولێر و بەغدایە كێشە و گرفتەكان چارەسەر بكەن، بەڵام لەدوای سەری ساڵیش مووچە هەر بەردەوام دەبێت، كە دەگوترێت تاوەكو سەری ساڵ مەبەست ئەوەیە كە گرفتەكان نابنە هۆی نەناردنی مووچە و ئەم چەند مانگە بێ کێشە مووچە دەنێردرێت، بۆ ساڵی داهاتووش هەوڵ دەدرێت سەرجەم کێشەکان چارەسەر بکرێن.