مووچەی خانەنشینانی هێزەکانی 70 دابەش دەکرێت

ئاڤا نیوز 
                        

                        
بڕیاری خەرجکردنی مووچەی مانگی تەممووزی خانەنشینانی هێزەکانی یەکەی 70 درا و وەزارەتی داراییش دەڵێت:  بۆ مانگەکانی داهاتوو هەر کێشەیەک بۆ مووچەکانیان دروست بێت، لە ئەستۆی بەرپرسانی ڕابردوو و ئێستای هێزەکانی 70ـە.

                               
ڕاگەیێنراوی فەرمی: بەڕێوبەرایەتی گشتیی ژمێرکاری لە وەزارەتی دارایی حکومەتی هەرێمی کوردستان ڕایگەیاند: خەرجکردنی مووچەی ئەو توێژە وەک کۆتا مانگ هاوشێوەی چەند ساڵی ڕابردوو لەسەر بەرپرسیارێتی وەزیری دارایی خەرجکراوە.

 

زانیاریی زیاتر: لە ڕاگەیێنراوەکەی وەزارەتی دارایی هاتووە: بۆ مانگەکانی داهاتوو هەر کێشەیەک بۆ خانەنشینانی هێزەکانی یەکەی 70 دروست ببێت کە لە گەنجینەی دووی سلێمانی مووچەیان بۆ خەرجدەکرێت، لە ئەستۆی بەرپرسانی ئێستا و ڕابردووی هێزەکانی حەفتایە کە زیاتر لە 10 ساڵە هەماهەنگییان لەگەڵ وەزارەتی پێشمەرگە نەکردووە بۆ ئەوەی کێشەکانیان چارەسەر بکرێت.

   

ئەمەش بزانە: بەپێی یاسای چاکسازی پێویست بوو لە دوای مانگی حەوتی ساڵی 2020 ئەو خانەنشینانەی دۆسیەی دروستیان هەیە، دۆسیەکانیان بخرابایەتە سەر بەڕێوەبەرایەتی گشتیی خانەنشینی لە وەزارەتی دارایی و ئابووری، کە ئەوە تێبینی تیمی هاوبەشی دیوانی چاودێریی دارایی عێراق و هەرێمی کوردستانە، نابێت هیچ خانەنشینێک لە دەرەوەی بەڕێوەبەرایەتیی خانەنشینی سەر بە وەزارەتی دارایی و ئابووری هەرێمی کوردستان مووچە وەربگرێت.