بانکە عێراقییەکان بە سیستەمی ئەمریکی پارە ڕەوانەی ئێران دەکەن

ئاڤا نیوز

 

بانکە عێراقییەکان لە ڕێگەی ئەو سیستمە بانکییەوە کە ئەمریکا بۆی دروست کردوون پارەیان بۆ ئێران ناردووە.

 

وێنە گەورەکە: بە گوێرەی ڕاپۆرتێکی ڕۆژنامەی وۆڵ ستریت جۆرناڵی ئەمریکی، بەغدا لەو پارەیەی کە لە فرۆشتنی نەوت دەستی کەوتووە دۆلاری بۆ ئێران ناردووە. ئێرانیش توانیویەتی بەو پارەیە پاڵپشتیی گرووپە تیرۆریستییەکان بکات.

 

زانیاریی زیاتر: ڕاپۆرتەکە بانکەکانی گەورە بانکداری عێراقی، عەلی غوڵام، وەک نموونە دێنێتەوە بەوەی چۆن سوودی لە سیستمی بانکیی فیدراڵیی نیویۆرکی ئەمریکا بینیوە تا پارە بۆ ئێران بنێرێت. ئاماژە بەوەش دەدات دوای نزیکەی 20 ساڵ بانکی فیدراڵ لە پشکنینی وردی بۆ هاتن و چوونی پارەکە ئەوەی بۆ دەرکەتووە و لە ماوەی یەک شەودا هەموو بانکەکانی عەلی غوڵامی داخستووە.

 

ئەوەی پێویستە بیزانیت: ئەمریکا گومانی لە زیاتر لە 24 بانکی عێراقی هەبووە کە پارەیان بۆ ئێران ناردبێت و یارمەتیی میلیشیاکانی سەر بە ئێرانیان دابێت.

 

درێژەی ڕاپۆرت...

بەگوێرەی پشکنینەکانی بانکی فیدراڵیی ئەمریکا لە نیویۆرک، لە ماوەی شەش مانگدا 19 کۆمپانیای عێراقی سێ بانکیان بۆ ناردنی 3.5 ملیار دۆلار بۆ دەرەوەی عێراق بەکارهێناوە. 

 

ئەمریکا زانیویەتی

بەرپرسانی باڵای گەنجینەی ئەمریکا سەرتاکانی ئەمساڵ لە دانیشتنێکدا لە بەغدا بە عێراقییەکانیان گوتووە، بانکە عێراقییەکان دەستگەیشتنیان بە دۆلاری ئەمریکی قۆستووەتەوە تا لە ڕێگەیەوە دۆلار بۆ سوپای قودس و سوپای پاسداران و میلیشیاکانی سەر بە ئێران لە عێراق دابین بکەن. 

برایان نێڵسۆن، جێگری وەزیری گەنجینەی ئەمریکا بۆ کاروباری تیرۆریزم و هەواڵگریی دارایی، بە بانکی ناوەندیی عێراقی گوتووە میلیشیاکان ڕۆڵیان لەو هێرشانەدا هەیە کە ئەو کات کراونەتە سەر هێزەکانی ئەمریکا و قوربانیان لێکەوتووەتەوە. 

 

گرنگیی دۆلار بۆ ئێران

ئێران لەلایەن ئەمریکاوە سزای جۆراوجۆری لەسەرە. یەکێک لە سزاکان قەدەخەکردنی ئێرانە لە دەستگەیشتن بە دۆلاری ئەمریکی. هەر ئەمەش وایکردووە بەهای تمەنی ئێرانی لە بەرامبەر دۆلار داببەزێت. ئێران ویستویەتی بە هاوکاری بانکە عێراقییەکان خۆی لە سزاکان بدزێتەوە، دەستی بە دۆلار بگات. بە گوتەی بەرپرسانی ئەمریکی، ئێران دۆلاری ئەمریکی بۆ کڕینی پارچەی درۆن و مووشەک بەکاردەهێنێت و هەروەها پاڵپشتیی دارایی میلیشیاکان لە ڕۆژهەڵاتی ناوەڕاست دەکات، لەوانەش هەر یەکە لە حەماسی فەلەستینی و حیزبوڵای لوبنانی کە لە ئۆکتۆبەرەوە لە جەنگدان لە دژی ئیسرائیل.

 

عەلی غوڵام

عەلی غوڵام، تەمەن 42 ساڵ، ئێستا دانیشتووی لەندەنە. ئەو لە گواستنەوەی دۆلاردا ڕۆڵێکی گەورەی هەبووە، بە جۆرێک نزیکەی 20٪ـی ئاڵوگۆڕە بانکییەکانی دۆلاری لە عێراق ئەنجام داوە.

هەر یەکە لە بانکەکانی عەلی غوڵام، بانکی وەبەرهێنانی ڕۆژهەڵاتی ناوەڕاستی عێراقی، بانکی ئیسلامیی ئەنساری و بانکی ئیسلامیی قەبیز، لە یەکەمینی ئەو بانکانە بوون کە لە کۆتاییەکانی 2022 لەلایەن ئەمریکاوە لە دەستگەیشتنیان بە دۆلار بلۆک کران. هیچ ڕێکارێکیش بەرامبەر بە غوڵام نەگیرایە بەر. ئەو ڕەتیدەکاتەوە پارەی بۆ ئێران ناردبێت.