پارتی لە ئەنجوومەنی پارێزگای نەینەوا دەبێتە ئۆپۆزسیۆن

ئاڤا نیوز 

سەرۆکی فراکسیۆنی پارتی لە ئەنجوومەنی پارێزگای نەینەوا، دەڵێت لە ئەنجوومەنی پارێزگای نەینەوا وەک ئۆپۆزسیۆن دەبن و دوو مەرجیان هەیە.

وێنە گەورەکە: نزیکەی دوو مانگە 13 ئەندامی هاوپەیمانی نەینەوای یەکگرتوو کە پارتی دیموکراتی کوردستان بەشێکە لەو هاوپەیمانییە، بەشداری دانیشتنەکانی ئەنجومەنی پارێزگای نەینەوایان نەکردووە.

لێدوانی فەرمی: ئەحمەد کەنعان کیکی، سەرۆکی فراکسیۆنی پارتی دیموکراتی کوردستان لە ئەنجوومەنی پارێزگای نەینەوا بە ئاڤا نیوزی ڕاگەیاند: دوو مەرجمان هەیە، یەکەم پێویستە سەرۆک و جێگری ئەنجومەن لابدرێن، دووەم ڕێککەوتنێکی ستراتیژی سیاسی نوێ بکرێت، تا جێبەجێکردنی مەرجەکانمان ئێمە دەبینە ئۆپۆزسیۆن لە ئەنجوومەنی پارێزگای نەینەوا.

ئەوەی پێویستە بیزانیت: ڕۆژی 28-7-2024 ئەنجوومەنی پارێزگای نەینەوا بەبێ بەشداری فراکسیۆنەکانی پارتی و نەینەوای یەکگرتوو کۆبوونەوەیەکی ئەنجامدا و 14 پۆستی قایمقام و بەڕێوەبەری ناحیەیان دابەشکرد، بەمەش ناڕەزایی زۆری لای پارتی و نەینەوای یەکگرتوو دروستکرد کە خاوەنی 13 کورسین، دواتر بە فەرمانی سەرۆکوەزیرانی عێراق گۆڕانکارییە کارگێڕییەکان ڕاگیران.