ئێران ڕەزامەندیدا لەسەر زیادکردنی 30 ملیۆن پێ سێجا غاز بۆ عێراق

ئاڤا نیوز  

ئێران ڕەزامەندی لەسەر زیادکردنی بڕی غازی دابینیکراو بۆ عێراق دەدات، بە مەبەستی دەستەبەرکردنی زیاتری کاتژمێرەکانی کارەبا لە خزمەت زیارەتکاران.

وێنە گەورەکە: عێراق بۆ بەکارخستنی وێستەگەکانی بەرهەمهێنانی کارەبا لە کۆتایی مانگی ئازاری ئەمساڵ گرێبه‌ستی پێنج ساڵەی له‌گه‌ڵ كۆمپانیای نیشتمانی ئێران واژۆکرد، بۆ هاورده‌كردنی 50 ملیۆن پێ سێجا غاز لە ڕۆژێکدا.

چیرۆکی سەرەکی: لیژنەیەکی پەرلەمان بە سەرۆکایەتی عەلی حەمیداوی دوێنێ یەکشەممە سەردانی کۆنسوڵخانەی ئێرانیان لە بەغدا کرد، بە مەبەستی زیادکردنی ئەو بڕە غازەی کە ئێران بۆ عێراقی دابین دەکات بە ئامانجی زیاتر خزمەتکردنی زیارەتکاران.

ڕاگەیێنراوی فەرمی: فەرمانگەی میدیای پەرلەمانی عێراق بڵاویكردەوە: دوای گفتوگۆ و هەوڵی بەردەوام بۆ بەدواداچوونی ڕێوەڕەسمەکانی چلە بە ئامانجی دۆزینەوەی چارەسەرێکی خێرا بۆ کێشەی دابینکردنی غازی ئێران، ئەمڕۆ وەڵامدانەوەی خێرای لێکەوتەوە.

زانیاریی زیاتر: "ئەمڕۆ پەیوەندی بە سەرۆکی لیژنەکە، عەلی حەمیداوی کرا و ئاگادار کرایەوە لە زیادکردنی بڕی 30 ملیۆن پێ سێجا".