10 ساڵ بەسەر کۆمەڵکوژی گوندی کۆچۆ تێدەپەرێت

ئاڤا نیوز

 

10 ساڵ بەسەر کۆمەڵکوژی گوندی کۆچۆی سەر بە قەزای شنگال تێدەپەرێت، کە لەلایەن داعشەوە سەدان هاونیشتمانی کوردی ئێزدی کوژران و سەدانی دیکەش ڕفێنران.

وێنە گەورەکە: دوای 12 ڕۆژ لە کارەساتی شنگال داعش هێرشی کردە سەر گوندی کۆچۆ تاوانێکی  دیکەی گەورە دژ بە کوردانی ئێزدی کرد.

ژمارەکان وادەڵێن: لە ڕۆژی 15-08-2014، چەکدارانی داعش هەزار و 250 کەسی خەڵکی گوندی کۆچۆیان دەستبەسەر کرد و خەڵکیان لەناو 18 گۆڕی بەکۆمەڵدا گولـلەباران کرد و نزیکەی 850 کەسیان ڕفاند.

خەڵكی گوندەكەیان سەرجەم دەستبەسەر كرد
دوای دەستبەسەرداگرتنی شنگال لەلایەن داعشەوە، چەکدارانی ئەو ڕێکخراوە لە ڕۆژی 03-08-2014، چواردەوری گوندی کۆچۆیان گرت و گەمارۆیاندا و ڕێگەیان نەدا خەڵکەکەی بچنە دەرەوە، تاوەکو ڕۆژی 15ـی ئەو مانگە چوونە نێو گوندەکە و سەرجەم خەڵکی گوندەکەیان دەستبەسەر کرد.

گێڕانەوەی ڕووداوەکە لەزاری ڕزگاربوویێکی کۆمەڵکوژییەکە
دکتۆر ئەلیاس ساڵح، خەڵکی گوندی کۆچۆیە و ئەو یەکێک بوو لەو 19 کەسەی لە کۆمەڵکوژی کۆچۆدا بە برینداری و بەشێوەیەکی موعجیزەئاسا ڕزگاری بوو، بۆ ئاڤا نیوزی گێڕایەوە، كاتژمێر 10ی به‌یانی ئەو لە نۆرینگەکەی خۆی بووە و نەخۆشێکی لابوو له‌ گوندی کۆچۆ، لە ناکاو دەیان ئۆتۆمبێلی پڕ له‌ چه‌كدارانی داعش به‌ چەکی قورس و شۆفڵه‌وه‌ گه‌یشتنه‌ ناو گونده‌كه‌، دواتر ئاگەدار کرانەوە کە هەموو لایەکیان لێگیراوە و دەبێت بچن بۆ قوتابخانەی گوندەکە و ناچار ڕۆیشتن.

 

قوتابخانە دوا وێستگەی یەکتر بینینی خێزانەکان بوو
پێشتر نزیکەی هەزار و 750 کەس لەناو گوندی کۆچۆدا دەژیان، لەگەڵ هێرشی داعش بۆ سەر شنگال ژمارەیەک خێزان گوندەکەیان بەجێهێشتبوو، هەموو ئەوانەی مابوون هەزار و 250 کەس بوون و لە قوتابخانەی گوندەکەدا کۆکرابوونەوە و له‌قاتی خواره‌وه‌ی قوتابخانەکە پیاوان و لە قاتی دووه‌میش ژنان و منداڵان دانرابوون، چەکدارانی داعش مۆبایل و پاره‌ و زێڕ له‌ خه‌ڵكەکە ده‌ستێنن، ته‌نانه‌ت بازنه‌ و ملوانكه‌ی ژنه‌كانیش، دەستکرا بە جیاکردنەوەی خێزانەکان لە یەکتر و ئیتر قوتابخانە دوا وێستگەی یەکتر بینینیان بوو، هەر بۆیەش ئێستاش قوتابخانی گوندی کۆچۆ، لە ناوەندنێکی زانستییەوە بووە بە مۆزەخانەی قوربانییەکانی ئێزدییەکان.

لە قوتابخانەوە بۆ کۆمەڵکوژی
پیاو و بەتەمەنەکان لە ئۆتۆمبێلی کیا بەزۆر سەردەخەن،  چه‌كداره‌كان پێیان گوتووە ده‌یانبه‌ن بۆ چیای شنگال و ئازاد دەکەن، به‌ڵام لە دەورووپشتی گونده‌كه‌، ئۆتۆمبێله‌كان ڕاده‌‌گرن و پۆل پۆل ڕیزیان ده‌كه‌ن، ژمارەیەک چەکداری داعش وەستابوون و هه‌رجاره‌ و ژمارەیەکیان گولـله‌باران ده‌كردن، بە قسەی ئه‌لیاس ئەو به‌ چاوی خۆی ده‌یبینی خزم و كه‌سوكاری به‌ پشتدا ده‌كەوتنه‌ ناو چاڵه‌كه‌وه‌ كاتێك له‌ پێشه‌وه‌ ده‌ستڕێژی گولـله‌یان لێده‌كرا، چه‌ند چه‌كدارێكیش وێنه‌ و ڤیدیۆی دیمه‌نه‌كه‌یان ده‌گرت.

گولـلەبارانکرنی ئەلیاس و چەند کەسێکی دیکە
بۆ کوشتنی بە کۆمەڵ ئەلیاس له‌گه‌ڵ ژماره‌یه‌كی دیکە ڕیزكران و بەهەمان شێوە درانە بەر ده‌ستڕێژی گولـله‌، وەک ئەو دەڵێت، سێ گولـلە ئاراستەی کراون و دوویان به‌ر قاچی كه‌وتوون و یەکێکی دیکە بەر زەوی کەوتووە لە نزیک سەری و خۆی خستووە، وه‌ك مردوو خۆی نیشانداوە، سه‌ره‌ڕای ئه‌وه‌ی چه‌كداره‌كان ده‌هاتنه‌ سه‌ریان و ته‌قه‌ی دیکەیان لێ كردووه‌، به‌ڵام هێچ گولـلەی دیکە به‌رنه‌كه‌وتووه‌.

 

چۆنیەتی ڕزگاربوونی
چەکدارەکانی داعش دوای کۆمەڵکوژییەکە بەهۆی بیستنی دەنگی فڕۆکە ئەوێ بەجێدێڵن و  ئه‌لیاس ئێواره‌ی هه‌مان ڕۆژ، لەگەڵ دوو کەسی دیکە لە شوێنی كۆمه‌ڵكوژییه‌كه‌‌ به‌ برینداری ڕادەکەن و بۆ ماوەی 15 کاتژمێر بەپێ و خۆشاردنەوە دەڕوون تاوەکو چیای شنگال دەگەنە لای هەندێک خێزان و لەوێشەوە بۆ ڕۆژئاوای کوردستان، دوای وەرگرتنی چارەسەری گوازراونەتەوە بۆ پارێزگای دهۆک.

تاوانەکانی داعش لە کۆچۆ
گوندی کۆچۆ بە دووری 20 کیلۆمەتر دەکەوێتە باشووری شنگال و لەکاتی هێرشەکەدا داعش لە کۆی هەزار و 250 کەس زیاتر لە 400 کەس کۆمەڵکوژ کرد و لە 18 گۆڕی بەکۆمەڵ لە دەورووپشتی گوندەکەدا زیندەبەچاڵیان کردن، 19 کەس بە برینداری لە کۆمەڵکوژییەکە ڕزگاربوون و 852 گەنج و کچ و ژن و منداڵ ڕفێنران و بۆ مووسڵ و سووریا بران.

هەوڵەکانی حکومەتی هەرێمی کوردستان بۆ ڕزگارکردنی ڕفێنراوان
لەسەرەتای کارەساتەکەوە و تاوەکو ئێستاش حکومەتی هەرێمی کوردستان بە چەندین ڕێگە بەدەم کوردانی ئێزدیەوە چووە، هەر لە دابینکردنی جێگەی حەوانەوە و هاوکاریکردنی ماددی و هەوڵی گەڕاندنەوەی ڕفێنراوان و گفتوگۆ لەگەڵ بەغدا بۆ ئاسایی کردنەوەی دۆخی قەزای شنگال و ئاوەدانكردنەوەی.