ئاڤا نیوز هۆکاری دواکەوتنی مووچە ئاشکرا دەکات

ئاڤا نیوز

لە عێراق دابەشکردنی مووچەی بەشێک لە وەزارەتەکان و خاوەن پێداویستییە تایبەتییەکان دواکەوتووە، تاوەکو ئێستاش مووچەی مانگی حەوت بۆ هەرێمی کوردستان نەنێردراوە، شارەزایەکی ئابووریش دەڵێت، کێشەکە تەکنیکی وردبینییە و عێراق گرفتی نەبوونی پارەی نەختینەی نییە.

چیرۆکی سەرەکی: مستەفا گەرعاوی، ئەندامی لیژنەی دارایی لە پەرلەمانی عێراق دەڵێت، بەهۆی نەبوونی پارەی نەختینەوە مووچەی فەرمانبەران 10 ڕۆژ دوادەکەوێت، بەڵام وەزارەتی دارایی ئەوە ڕەتدەکاتەوە و جەخت دەکاتەوە کە دابەشکردنی مووچە بەبێ دواکەوتن بەردەوامە. 

لێدوانی فەرمی: د.نەبیل مەرسوومی، شارەزای ئابووری بە ئاڤا نیوزی گوت، هەندێک مانگ دابەشکردنی مووچە لە عێراق لەنێوان سێ تا نۆ ڕۆژ دوادەکەوێت، هۆکارەکەشی بۆ کێشەی هونەری لە وەزارەتی دارایی دەگەڕێتەوە.

خاڵی  ئەرێنی: د.نەبیل ئاماژە بەوە دەکات، هۆکاری دواکەوتنی مووچە نەبوونی پارەی کاش نییە، چونکە عێراق کێشەی کەمی پارەی نەختینەی نییە و هەر کاتێکیش ئەو کێشەیە هەبێت، بانکی ناوەندی بە ئاسانی دەتوانێت چارەسەری بکات، چونکە مانگانە لە پارەی نەوت زیاتر لە هەشت ملیار دۆلار لەبەردەست حکومەتە و بانکی ناوەندیش ئەو پارەیە لە دۆلارەوە بۆ دینار دەگۆڕێتەوە.

گۆشەیەکی دیکە: ئەو شارەزایەی بواری ئابووری باوەڕی وایە زۆرترین گرفتی دواکەوتنی مووچە بۆ مووچەخۆرانی هەرێمی کوردستان دروست بووە، ئەویش بەهۆی وردبینی و زیادبوونی مانگانەی مووچەی فەرمانبەران و هێزە ئەمنییەکانی هەرێم، ئەوەش لە مانگەکانی داهاتوودا چاوەڕێ دەکرێت چارەسەر بکرێت.

لەلایەکی دیکەوە:  ئەمڕۆ سێشەممە لیژنەی دارایی پەرلەمانی عێراق میوانداریی هەریەک لە وەزیرانی دارایی و نەوت و پلاندانان و سەرۆکی بانکی ناوەندیی دەکات، لەبارەی کۆمەڵێک پرسی دارایی گفتوگۆ دەکەن، لەوانە پرسی مووچە.

باکگراوند: مەسعوود حەیدەر، بریکاری وەزیری دارایی عێراق ئێوارەی دوێنێ هۆکارێکی نەناردنی مووچەی ئاشكراکرد و گوتی: "دیوانی چاودێری دارایی پێداچوونەوە بە خەرجی دەوڵەت دەکات بۆ ھەموو مانگەکانی یەک تا شەشی ئەمساڵ بە ھەرێمی کوردستانیشەوە، پێداچوونەوەکە بەردەوامە بۆیە ناردنی پارە بۆ هەرێمی کوردستان دواکەوتووە."