هەسەدە گرووپە چەکدارەکانی سەر بە حکومەتی سووریا گەمارۆ دەدات

ئاڤا نیوز  

بۆ ڕۆژی شەشەم گرژییەکانی نێوان هەسەدە و گرووپە چەکدارەکانی سەر بە سووریا لە ڕۆژهەڵاتی سووریا و ڕۆژئاوای کوردستان بەردەوامە، عێراقیش بەهۆی مەترسی دزەکردنی چەکدارانی داعش هێز لەسەر سنوور کۆدەکاتەوە.

وێنە گەورەکە: حەوتی ئەم مانگە سەدان چەکدار کە هێزەکانی سووریای دیموکرات دەڵێت لەلایەن حکومەتی سووریا و ئێرانەوە نێردراون، دزەیانکردە ناو بەشی ڕۆژهەڵاتی ڕووباری فوڕات، لە ئەنجامیشدا شەڕ و پێکدادان لەنێوان هەردوولا ڕوویدا و تائێستاش ڕووبەڕووبوونەوەکان بەردەوامن.

لێدوانی فەرمی: ڕامی عەبدولڕەحمان، بەڕێوەبەری ڕوانگەی سووری بۆ مافەکانی مرۆڤ بە ئاڤا نیوزی ڕاگەیاند: گرووپە چەکدارەکانی نزیک لە ئێران هێزێکی زۆریان لە ڕۆژئاوای ڕووباری فوڕات کۆکردووەتەوە و دەیانەوێت هێرش بکەنە سەر چەند شار و شارۆچکەیەک لە بەشی رۆژهەڵاتی ڕووبارەکە.

لە لایەکی دیکەوە: هەسەدە گەمارۆی سەر چوارگۆشەی ئەمنی لە قامیشلۆ و حەسەکە تووندکردووەتەوە، داوای ڕادەستکردنی ئەو کەسانە دەکات کە لە ناوچەکانی ژێر دەسەڵاتیدا بوون و بەشداربوون لە هێرشەکەی حەوتی ئاب. لەبەرامبەریشدا حکومەتی سووریا هێزی زیاتری بۆ شکاندنی گەمارۆکە ڕەوانەکردووە.

ئەوەی پێشبینی دەکرێت: ئەوەی ئێستا لە سووریا ڕوودەدات کاریگەری لەسەر عێراقیش دەبێت، بۆیەش بەغدا هێزی سەربازی ڕەوانەی سنووری سووریا کردووە.