پارێزەرێکی ڕاوێژکار: کۆبوونەوەکەی ئەنجوومەنی پارێزگای کەرکووک نایاساییە

ئاڤا نیوز

 

پارێزەرێکی ڕاوێژکار ڕایدەگەیێنیت، بەپێی دەستوور کۆبوونەوەکەی دوێنێ شەوی ئەنجوومەنی پارێزگای کەرکووک نایاساییە، دەتوانرێت سکاڵا لەسەر کۆبوونەوەکە تۆمار بکرێت.

 

وێنە گەورەکە: شەوی 11-8-2024، کۆبوونەوەی ئەنجوومەنی پارێزگای کەرکووک لە هۆتێل ڕەشید کرا، سەرۆکی ئەنجوومەنی پارێزگام پارێزگار و جێگرێکی هەڵبژێردران.

 

لێدوانی فەرمی: ئاهەنگ نوری بە ئاڤا نیوزی گوت: بەگوێرەی یاسای ژمارە 4 لە مادەی 13 بڕگەی 4ـی ئەنجوومەنی پارێزگان 30-4-2024، کە لە پەرلەمانی عێراق دەرچووە، پێویستە پێکهێنانی ئیدارەی کەرکووک بە ڕێککەوتنی نێوان هەموو لایەن و پێکهاتەکان بێت و هیچ لایەنێک پشتگوێ نەخرێت، ئێستا ئەم بڕگەیە پێشێلکراوە.

 

زانیاریی زیاتر: پێشێلکاریە یاساییەکە بەمجۆرەیە، 24 کاتژمێر پێشوەخت ئەندامانی ئەنجوومەن ئاگادار نەکراونەتەوە و دانیشتنەکە لە بینای ئەنجوومەن نەکراوە.

 

قووڵتر: بەتەمەنترین ئەندامی ئەنجوومەنی پارێزگا لە کۆبوونەوەکە ئاگادار نەکراوەتەوە، لەکاتێکدا دەبوو ئاگادار بکرێتەوە و لە ئەگەری ڕەتکردنەوەیدا دووەم بەتەمەنترین ئەندام دانیشتنەکەی بەڕێوەببردبا.

 

ئەمەش بزانە: بڕگەی 4 لە ماددەی 93ی دەستووری عێراق باس لەوە دەکات، دادگای فیدراڵی بەرپرسە لە کێشەی پارێزگاکان، هەر کێشەیەک لە دەسەڵاتی پارێزگاکان هەبێت، دەتوانرێت سکاڵا تۆمار بکرێت و لێپێچینەوە بکرێت، بەگوێرەی ئەم بڕگەیە دەتوانرێت سکاڵا لەسەر کۆبوونەوەکە و هەڵبژاردنی پارێزگار و سەرۆکی ئەنجوومەنی پارێزگا بکرێت.