ڕاوێژکارێکی سوودانی: بە زیادبوونی گرژییەکانی ناوچەکە عێراق یەکەم وڵات دەبێت کە زیانی بەردەکەوێت

ئاڤا نیوز

 

ڕاوێژکاری دارایی سەرۆکوەزیرانی عێراق جەخت لەوە دەکاتەوە, زیادبوونی گرژییە ئەمنی و سیاسییەکان لە ناوچەکە سەردەکێشێت بۆ دروستبوونی قەیرانێکی ئابووری و پێیوایە, عێراق یەکەم وڵاتی زیانمەدنی ئەو شەڕە دەبێت.

 

وێنە گەورەکە: پەرەسەندنی گرژییەکانی نێوان ئیسرائیل و گرووپە چەکدارییەکانی سەر بە ئێران و خودی ئێران لە ناوچەکە، ترس و دڵەڕاوکێیەکی زۆری وڵاتانی ناوچەکە دروست کردووە و مەترسی ئەوەیان هەیە پریشکی ئەو ئاگرە ئەوانیش بگرێتەوە و بە دووریشی نازانن زیادبوونی ئەو گرژیانە بێ زیان بۆ ئەوان تێپەڕێت.

 

لێدوانی فەرمی: مەزهەر محەممەد ساڵح، ڕاوێژکاری دارایی سەرۆکوەزیرانی عێراق بە ئاڤا نیوزی ڕاگەیاند: 40%ـی کۆی نەوتی هەناردەکراو بۆ بازاڕەکانی جیهان لەلایەن وڵاتانی کەنداوەوە دابین دەکرێت، لە ئەگەری ڕوودانی ململانێیەکی جددی لە ناوچەکە بە گشتی و کەنداو بە تایبەتی لەوانەیە ببێتە هۆی داخستنی گەرووی هورمز، بۆیە وڵاتەکەمان کوەیت، بەحرەین و قەتەر لە پێشەنگی ئەو وڵاتانە دەبن کە بەهۆی داخستنی گەرووی هورمزەوە زیانیان بەردەکەوێت".

 

مەترسییە پێشبینیکراوەکان: 100% هەناردەی نەوتی عێراق لەڕێگەی کەنداوی عەرەبییەوە بۆ بازاڕەکانی ئاسیا و جیهان دەچێت، لەکاتێکدا سعودیە کە یەکێکە لە گەورەترین هەناردەکارانی نەوت لە جیهان، بە تێكڕای زیاتر لە 8 ملیۆن بەرمیل لە ڕۆژێکدا، دەتوانێت دەریای سوور وەک ڕێگەی جێگرەوە بەکاربهێنێت. بەدوایدا ئیمارات و عومان دێن، هەریەکەیان نەوتەکەیان لە دەریای عەرەبییەوە هەناردە دەکەن. بۆیە کاریگەری و مەترسییەکان بەپێی بەردەستبوونی بەندەرە جێگرەوەکانی هەناردەکردن دەگۆڕێت.

 

زیانە سەرەکییەکان: بە گوتەی ساڵح، بەو پێیەی ئەمە کاریگەریی لەسەر بودجەی وڵاتانی کەنداو دروست دەکات، هاوکات بازاڕەکانی جیهانیش لە یەک لەسەر سێی پێداویستییەکانی نەوتی کەنداو بێبەش دەبن، لە بەرامبەردا ئەمە لێکەوتەی مەترسیدار بۆ دۆخی ئابووریی جیهانی بەدوای خۆیدا دەهێنێت، ئەمەش بەو مانایە دێت کە هەموو جیهان دەچێتە ناو قەیرانێکی ئابوورییەوە".