چیرۆكی كچێكی ڕزگاربووی دەستی داعش

ئاڤا نیوز

 
زەینەب مچوو بەرەكات، كچێكی ڕزگاربووی دەستی داعشە و لەگەڵ هێرشی ئەو ڕێكخراوە بۆ سەر شنگال، هاوشێوەی هەزاران كەسی دیكە دەستگیركران، بۆ ئاڤا نیوز باسی چیرۆكی ژیانی ژێردەستی داعش و ڕزگاربوونی دەكات.

وێنە گەورەكە: لە هێرشی 03-08-2014ـی داعش بۆ سەر شنگال شەش هەزار و 417 كەس لەلایەن چەكدارانی ئەو ڕێكخراوەوە دەستگیركران، لەو ژمارەیە سێ هەزار و 596 ڕزگاركراون و دوو هەزار و 599 كەسیش ماون.

چیرۆكی سەرەكی: زەینەب شەوی دوو لەسەر سێی ئاب وەكو هەموو خەڵكی دیكەی شنگال بە دڵێكی پڕ هیوا و خەونی گەورەوە خەوت، بەڵام بەیانی ڕۆژی سێی مانگ ڕێگەی تەواوی ژیانی گۆڕی و چاوی بەسەر تاریكییەكدا هەڵهێنا كە جگە لە كوشتن و بڕین بڕوایان بە هیچ نەبوو، كەوتە دەستی داعش و ئیتر ئەو خەندە و پێكەنینەی بەجارێك بۆ گریان و شینی بەردەوام گۆڕا.

ساتی هێرشی داعش
زەینەب خەڵکی گوندی وەردێی سەر بە قەزای شنگالە و كاتێك ئەم كارەساتە بەسەریدا هات تەمەنی 14 ساڵ بوو لەگەڵ هێرشەكەی داعش ئەو لەگەڵ 150 دانیشتووانی گوندەكەی دەستگیركران، بە بارهەڵگر گوازرانەوە  بۆ شنگال و دواتریش بەشكران و هەر بەشێكیان بۆ ناوچەیەكی ژێر دەسەڵاتیان بردن.

دەستگیركردنی زەینەب و خێزانەكەی
لەگەڵ زەینەب خێزانەكەشی دەستگیركران كە لەگەڵ دایك و باوك سێ خوش و چوار برا و دوو براژن و سێ منداڵیان پێكەوە كەوتنە دەستی داعش و تەنیا برایەك و خوشكێكی ڕزگاریان ببوو، ئەوان هەمووان پێكەوە برانە بەعاج و لەوێشەوە بۆ كۆمەڵگەی ڕیسالەی سەر بەو قەزایە و ئیتر لەوێ وەك زیندانی لە ماڵێكدا هێڵرانەوە و بۆ ماوەی ساڵێك و حەوت مانگ بەو شێوەیە ژیاون.

ژیانی ژێردەستی داعش
وەك ئەو باسی دەكات داعش ژیانێكی هاوشێوەی دۆزەخی بۆ دروست كردبوون و لە هەموو ئازادییەكانی پێشوویان دابڕێنراوبوون و وەك خزمەتكار كاریان پێكردوون، چەكدارانی داعش هەوڵیانداوە زەینەب وەك بەشێكی زۆری كچانی ئێزدی بۆ خۆیان ببەن، بەڵام زەینەب پێش ئەوە بە چەكدارانی گوتبوو" من كچ نیم و هاوسەرگیریم كردووە". بۆیە وازیان لێهێناوە و ڕێگەیان داوە لەگەڵ خانەوادەكەی لە ماڵێكدا لەژێر چاودێری ئەواندا بن، داعش ئەوانی ئازارداوە و هەر شتێكیان بەدڵی چەكدارەكان نەبووایە ئەشكەنجەیان دەدان.

ژیانی ڕۆژانە و ئێش و ئازارەكانیان
بەپێی قسەی زەینەب، ساڵێك و حەوت مانگ ئەوان كارەبایان نەبینیوە و خواردنێكی خۆشیان نەخواردووە جگە لە خراپی و كەمی خواردنی ڕۆژانە، بە درێژایی ئەو ماوەیەی لەدەستی داعش دابوون یەكجاریش گۆشت و میوەیەكیان نەخواردووە.
جگە لەمەش نەهامەتییەكانیان بە جۆرێك بووە گریان بەشی سەرەكی ڕۆژانەی ئەو خێزانە بووە و بەهۆی گریانی ڕۆژانە و ئەو دۆخەی ئەوان تێیدابوون، دایكی زەینەب چاوەكانی لەدەستداوە و برایەكیشی كە لەتەمەنێكی بچووكدا بووە لەتاو لێدان و ئەشكەنجەوە تووشی بیرچوونەوە بووە، خۆشی تووشی چەندین نەخۆشی بووە ئێستاش كە 10 ساڵە بەردەوام دەچێتە لای پزیشكی دەروونی، دوای ڕزگاربوونیش بۆ ماوەی مانگ و نیوێك چارەسەری پزیشكی وەرگرتووە، چونكە لە دۆخێكی خراپی تەندروستی دابووە.

 

چۆنیەتی ڕزگاربوون
پلانێك لەلایەن نووسینگەی ڕزگاركردنی ڕفێنراوانی دەستی داعشی دانراوە و توانراوە لەڕێگەی پارەدان ڕێگەیەك بۆ ڕزگاركردنی ئەو خێزانە بدۆزنەوە و كاتژمێر 03:30 خولەكی بەرەبەیانی ڕۆژی 04-03-2016، زەینەب و خێزانەكەی ڕایانكردووە چوونەتە ڕۆژئاوای كوردستان، لە ڕێگادا جگە لەترس ئەوان لە پشتی ئۆتۆمبێلێكی پیكابدابوون تاوەكو گەیشتوونەتە نێو خاكی سووریا لەژێر باران و سەرما بوون، لەوێشەوە بۆ خانەسوور و سنوونێ و دواتر گەڕاندنەوەیان بۆ پارێزگای دهۆك.

لەتاریكی داعشەوە بۆ دووبارە دەستپێكردنی ژیانێكی ئازاد
زەینەب ئێستا تەمەنی 25 ساڵە و لە كەمپی شاریا نیشتەجێن و وێڕای ئەوەی نەگەڕاونەتەوە ژیانی پێش ڕووداوەكانی سێی ئاب، بەڵام دڵخۆشە بەوەی لەنێو خێزانەكەیدایە و بە براو و خوشكی شادبوونەتەوە و وەك خێزانەكی بەختەوەر لەسایەی ئارامی و نێو خێزان و خەڵكی خۆیاندا ژیان بەسەر دەبەن، ئەو ئێستا توانیویەتی ببێتە یەكێك لە چالاكوانان و بەرگری لە مافی قوربانیانی كوردانی ئێزدی و ڕزگاربووان بكات، وەك زەینەب دەڵێت، ئێمە تووشی كارەساتێكی زۆر گەورە و دڕندانە بووین، بەڵام لەناونەچووین و بەهێزی ماینەوە.