چوار فرۆشگەی جوانكاری لە هەولێر داخران

ئاڤا نیوز  

بەڕێوەبەرایەتی گشتی تەندروستی هەولێر ڕایگەیاند، چوار شوێنی کۆزمەتیک (جوانكاری ژنان) لە هەولێر بە هۆی پابەند نەبوونیان بە ڕێنماییەکانی وەزارەتی تەندروستی داخران.

وێنە گەورەکە: چاکسازییەکانی کابینەی نۆیەم، لە کەرتی تەندروستی بەردەوامن، بۆ ڕێگریکردن لە ساغکردنەوەی دەرمانی ساختە و کۆنترۆڵکردنی نرخەکەی، لەو چوارچێوەیەدا نابێت هیچ دەرمانێك بە بێ ستیكەری فەرمی بفرۆشرێت.

بڵاوکراوەی فەرمی: بەڕێوەبەرایەتی گشتی تەندروستی هەولێر ڕایگەیاند: تیمەکانی چاودێری تەندروستی و سەلامەتی خۆراک، لەبەڕێوەبەرایەتی پاراستنی تەندروستی هەولێر بە هەماهەنگی قایمقامیەتی قەزای ناوەندی هەولێر، هەڵسان بە داخستنی چوار شوێنی کۆزمەتیک بە هۆی پابەند نەبوونیان بە ڕێنماییەکانی وەزارەتی تەندروستی و ڕێکلام کردن و فرۆشتنی چا و قاوەی کێش دابەزاندن کە ئەمەش پێچەوانەی ڕێنماییەکانە.

زانیاریی زیاتر: ڕێکلام کردن بۆ ئەو بەرهەمانە قەدەغەیە و تەنیا دەبێت لە دەرمانخانەکان بفرۆشرێت بە ڕێگەپێدانی کوالیتی کۆنتڕۆڵ و لەژێر چاودێری پزیشکی پسپۆری تایبەمەند.