لە دیالە دوو چەکداری داعش دەکوژرێن

ئاڤا نیوز

 

فەرماندەیی ئۆپەراسیۆنە هاوبەشەکانی عێراق کوژرانی دوو چەکداری داعشی لە پارێزگای دیالە ڕاگەیاند کە یەکێکیان پشتێنەی بۆمبڕێژکراوی بەستبوو.

 

وێنە گەورەکە: ئەگەرچی لە ساڵی 2019ـوە کۆتایی بە دەسەڵاتی داعش هێنراوە، بەڵام شانە نوستووەکانی ئەو ڕێکخراوە ناوە ناوە چالاکی دەکەن و هێرش دەکەنە سەر هێزە ئەمنییەکان و خەڵکی مەدەنی.

 

ڕاگەیێنراوی فەرمی: فەرماندەیی ئۆپەراسیۆنە هاوبەشەکان ڕایگەیاند: هێزەکانی سەر بە هەواڵگریی سەربازیی لە یەکێک لە بێستانەکانی گوندی عیت لە دیالە گەمارۆی دوو "تیرۆریست"ـیان دا و ڕووبەڕوویان بوونەوە.

 

چی ڕوویدا؟ هێزەکە توانیان هەردوو چەکدارەکە بکوژن، یەکێک لە چەکدارەکان پشتێنەی بۆمبڕێژکراوی بەستبوو.

 

ئەمەش بزانە: بەرەبەیانی ڕۆژی 1-7-2024، لیوای 14ی پیادەی وەزارەتی پێشمەرگە، بە هاوبەشی لەگەڵ لیوای 50ی پیادە و فەوجی مغاویری سەربە فیرقەی 14ی سوپای عێراقی، ئۆپەراسیۆنێکی هاوبەشیان لە هەردوو گوندی کوشاف، بناری چیای قەرەچوخ ئەنجام دا.