ئەمریکا بزووتنەوەی ئەنساروڵای ئەوفیای عێراقی دەخاتە لیستی تیرۆرەوە

ئاڤا نیوز 

ئەمریکا بزووتنەوەی ئەنساروڵای ئەوفیای عێراقی و ئەمیندارەکەی خستە لیستی تیرۆرەوە، دەشڵێت "هێز و باڵەکانی ئێران لاواز دەکەین".

 

وێنە گەورەکە: ئەو بزووتنەوەیە چەندین جار هێرشی کردووەتەوە سەر هێزەکانی ئەمریکا، تۆمەتبار دەکرێت بە تیرۆرکردنی چەندین چالاکوانی خۆپیشاندانەکانی تشرینی یەکەمی ساڵی 2019.

ڕاگەیێنراوی فەرمی: وەزارەتی دەرەوەی ئەمریکا ڕایگەیاند: بزووتنەوەی ئەنساروڵا ئەوفیای عێراقی و حەیدەر غەرراوی، ئەمینداری گشتی بزووتنەوەکە خستە لیستی تیرۆرەوە و بە بەشێک لە چەکدارانی سەر بە ئێران و بەرەی مقاوەمەی ئیسلامی لە عێراق دایدەنێت.

بۆچوونی لایەنی بەرامبەر: بزووتنەوەی ئەنساروڵڵای ئەوفیای عێراق لە ڕاگەیێنراوێکدا ڕایگەیاند: "ئەم بڕیارانە ئیرادەمان بەهێزتر دەکات لەسەر ئەوەی بەردەوام بین لە مقاوەمە و خەباتکردن".

ئەوەی پێویستە بیزانیت: بزووتنەوەی ئەنساروڵڵای ئەوفیا لە ساڵی 2013 بە ناوی "قەوارەی سیدق و عەتا" لە پارێزگای میسان دامەزرا و بەشداری هەڵبژاردنەکانی پارێزگاکەی کرد و لە ساڵی 2014 باڵی چەکداریی بە ناوی ئەنساروڵڵای ئەوفیا دروستکرد و لیوای 19ی حەشدی شەعبی پێکهێنا.