بۆ بەجێهێنانی گەورەترین ڕوکنی حەج حاجیان دەچنە سەر کێوی عەرەفە

ئاڤا نیوز 

 

زیاتر لە ملیۆنێک و 200 هەزار حاجی بۆ بەجێهێنانی گەورەترین ڕوکنی حەج ئەمڕۆ دەچنە سەر کێوی عەرەفە و لە یەکەم ڕۆژی جەژنی قوربانیشدا دەست بە "ڕەجمکردنی شەیتان" دەکەن.

 

وێنە گەورەکە: ڕۆژی شەممە 15-06-2024 کە بەرامبەرە بە 9ـی زیلحیجەی 1445ـی کۆچی، زیاتر لە ملیۆنێک و 200 هەزار کەس لە سەرتاسەری جیهان بە مەبەستی بەجێهێنانی یەکێک لە بنەمایەکان لە ئەرکانەکانی ئیسلام کە حەجە، دەچنە سەر کێوی عەرەفە.

 

بۆچی گرنگە: حاجییان تاوەکو نەچنە سەر چیای عەرەفە، فەرزەکەیان بەجێ نابێت، چونکە یەکێکە لە گەورەترین ڕوکنەکانی حەج لە ئایینی ئیسلامدا. 

 

ئەوەی ئێستا ڕوودەدات: ئەمڕۆ حاجییان لە بەرەبەیانەوە ڕوودەکەنە سەر کێوی عەرەفە و تاوەکو ئێوارە دەمێننەوە، تێیدا نوێژ و نزا دەکەن و قورئان دەخوێنن.

 

زانیاریی زیاتر: دوای خۆرئاوابوون حاجییان دەگەڕێنەوە موزدەلیفە و شەو لەوێ دەمێننەوە، بۆ سبەی یەکشەممە بەرەو مینا بەڕێدەکەون و کە هاوکاتە لەگەڵ یەکەم ڕۆژی جەژنی قوربان، دەست بە "ڕەجمکردنی شەیتان" دەکەن.

 

ئەمەش بزانە: ئەمساڵ چوار هەزار و 685 حاجی هەرێمی کوردستان بە مەبەستی بەجێهێنانی فەریزەی حەج، گەشتیان بۆ سعودیە کردووە.