زیانەكانی بەرگریی شارستانی بەهۆی ئاگر لە پاڵاوگەیەكی گوێڕ

ئاڤا نیوز 

گوتەبێژی بەرگریی شارستانی هەولێر ڕایگەیاند، دوای  نزیکەی 20 کاتژمێر کارکردنی بەردەوام توانیمان ئاگرەکەی پاڵاوگەی نەوت و گاز لەسەر ڕێگەی گوێڕ کۆنترۆڵ بکەین.

چیرۆکی سەرەکی: کاتژمێر 8:30 شەوی 12-6-2024 ئاگرێک لە پاڵاوگەیەکی نەوت و گاز لەسەر ڕێگەی گوێڕ کەوتەوە، بەڵام کاتژمێر 3:00ی پاشنیوەڕۆی ئەمڕۆ 13-6-2024 توانرا کۆنترۆڵ بکرێت.

لێدوانی فەرمی: موقەدەم شاخەوان سەعید، گوتەبێژی بەرگریی شارستانی هەولێر، بە ئاڤا نیوزی گوت: دوای نزیکەی 20 کاتژمێر کارکردنی بەردەم، کە 32 تیمی بەرگریی شارستانی  کە لە 150 کارمەند و ئەفسەر و بەڕێوەبەری گشتیی پێکهاتبوون، توانرا ئاگرەکە کۆنترۆڵ بکرێت.

زیانی مرۆیی: 14 کارمەندی بەرگریی شارستانی بریندار بوون، 10 کەسیان تەنگەنەفەس بوون، چوار  کەسیان سووتاون و دوانیان برینەکانیان سەختە.

زیانی ماددی: چوار ئۆتۆمبێلی جۆراو جۆری ئاگر کوژێنەوە سووتاون، کۆی گشتیی نرخەکانیان بە زیاتر لە ملیۆنێک دۆلار دەخەمڵێنرێت.

ئەوەی پێویستە بیزانیت: زیاتر لە 100 هەزار لیتر فوم بۆ کوژاندنەوەی ئاگرەکە بەکارهێنراوە، کە نرخی هەر لیترێک سێ دۆلارە، کۆی گشتی بە زیاتر لە 300 هەزار دۆلار دەخەمڵێنرێت.