وەزیری دەرەوەی ئێران بەوەکالەت سەردانی بەغدا و هەولێر دەکات

ئاڤا نیوز

وەزیری دەرەوەی ئێران بەوەکالەت سەردانی بەغدا و هەولێر دەکات، ئەمەش بە یەکەم سەردانی دادەنرێت بۆ عێراق دوای دەستبەکاربوونی.

 

لێدوانی فەرمی: ناسر کەنعانی، گوتەبێژی وەزارەتی دەرەوەی ئێران لە کۆنگرەیەکی ڕۆژنامەوانیدا ڕایگەیاند: "عەلی باقر کنی، وەزیری دەرەوە بەوەکالەت، ڕۆژی هەینی 14-06-2024 سەردانی بەغدا و هەولێر دەکات، ئێستاش کار لەسەر دیاریکردنی وادەی گەشتەکە و هەماهەنگی لەگەڵ دەسەڵاتدارانی عێراق دەکرێت".

 

ئەوەی پێویستە بیزانیت: ڕۆژی 19-05-2024 هێلیکۆپتەری ئیبراهیم ڕەئیسی لە تەورێز تێکشکا و بەهۆیەوە سەرۆککۆمار و وەزیری دەرەوە گیانیان لەدەست دا، ئەو وڵاتە ڕۆژی 28ـی ئەم مانگەی بۆ هەڵبژاردنی سەرۆککۆمار دیاری کرد و شوێنە بەتاڵەکەی وەزیری دەرەوەشی بەوەکالەت پڕکردەوە.

 

لە لایەکی دیکەوە: لە چەند ڕۆژی ڕابردوودا عەلی باقری کنی سەردانی تورکیا و پێش ئەوەش سەردانی سووریا و لوبنانی کرد، ئەمەش لە چوارچێوەی گەشتێکیدا بۆ ناوچەکە.