تێچووی دەرهێنان و گواستنەوەی نەوت لە خشتەی بودجە زیاد کرا

ئاڤا نیوز

 

ئەندامێکی لیژنەی نەوت و وزە ئاماژە بەوەدەدات، لە خشتەی بودجە، تێچووی دەرهێنان و گواستنەوەی نەوت زیاد کرا و دەنگی لەسەر درا، کە بۆ هەر بەرمیلێک تێچووەکەی زیاتر لە 20 دۆلار دەبێت.

 

وێنە گەورەکە: لە دانیشتنی ئەنجوومەنی نوێنەران بەبێ دەستکاریکردن دەنگ لەسەر ئەو خشتەیە درا کە لە ئەنجوومەنی وەزیران بۆ ئەنجوومەنی نوێنەران نێردرابوو، جارێکی دیکە خشتەکە بۆ ئەنجوومەنی وەزیران دەنێردرێتەوە.

 

لێدوانی فەرمی: د. سەباح سوبحی، ئەندامی لیژنەی نەوت و گاز لە ئەنجوومەنی نوێنەرانی عێراق بە ئاڤا نیوزی گوت، "13 دۆلار بۆ تێچووی دەرهێنان و گواستنەوەی کۆمپانیاکانی نەوت زیاد کراوە".

 

ژمارەکان وادەڵێن: لە خشتەی بودجەی 2024 مانگانە دوو تریلیۆن و 700 ملیار دینار وەک خەرجیی دەرهێنانی نەوت تەرخانکراوە، کە بۆ هەر بەرمیلێک 14 دۆلار دەکات. خەرجیی گواستنەوەی نەوت لە خشتەکە زیاد کراوە، مانگانە تریلیۆنێک و 400 ملیار دینار لە بودجەی گشتی تەرخانکراوە کە بۆ هەر بەرمیلێک دەکاتە 4.5 دۆلار.