باران و تەرزە زیانی بە نزیکەی سێ هەزار دۆنم بەرهەمی جووتیاران گەیاندووە

ئاڤا نیوز

 

بەهۆی بارانبارینی بەخوڕ و ئەو تەرزەی ماوەی ڕابردوو باریوە، نزیکەی سێ هەزار دۆنم زەوی چێنراو بە گەنم و جۆ لە ناحیەی قەراج زیانی بەرکەوتووە.

 

لێدوانی فەرمی: مەروان حوسێن، بەڕێوەبەری کشتوکاڵی مەخموور بە ئاڤا نیوزی گوت: "ئەمساڵ لە سنوورەکەمان 385 ملیم باران باریوە، بارانبارین و تەرزە زیانی بە نزیکەی دوو هەزار و 500 دۆنم گەنم و 500 دۆنم جۆ گەیاندووە".

 

زانیاریی زیاتر: زەویی ئەو گوندانەی زیانیان بەرکەوتووە بریتین لە ئازیکەند، عەلیەڕەش و قەڵاتەسۆران لە بناری چیای قەرەچوغ.

 

ئەوەی پێویستە بیزانیت: ناحیەی قەراج سەر بە قەزای مەخموورە و 79 گوندی لەخۆگرتووە، ئەمساڵ لەو ناحیەیە نزیکەی 200 هەزار دۆنم زەوی بە گەنم و جۆ چێنراوە.