لە ڕێگەی بانکەکانەوە قەرزی بچووک بە گەنجان دەدرێت

ئاڤا نیوز

باڵیۆزی یەکێتیی ئەوروپا لە عێراق لە دیداری سلێمانی باسی لە هەنگاوەکانی بەرەوپێشبردنی ژێرخانی ئابووری عێراق کرد، یەکێک لەوانەش پێدانی قەرزە بە گەنجان بۆ پرۆژەی بچووک.
  
وێنە گەورەکە: یەکێتیی ئەوروپا چیدیکە بە شێوازی کلاسیک هاوکارییەکانی بۆ عێراق نانێرێت، لە ساڵی 2014 ەوە شێوازی هاوکارییەکان لە مرۆییەوە بۆ گەشەپێدان گۆڕاوە و لە داهاتوودا شێوازی گەشەپێدانەکەش دەگۆڕێت.

لێدوانی فەرمی: تۆماس سەیلەر، باڵیۆزی یەکێتیی ئەوروپا لە عێراق، لە پانێڵێکدا لە دیداری سلێمای ڕایگەیاند، ساڵی داهاتوو قەرز بە بانکەکانی عێراق دەدرێت، بەمەبەستی ئەوەی پاڵپشتی گەنجان بکرێت بە پێدانی قەرزی بچووک چ بە شێوازی ڕاستەخۆ یاخود لە ڕێگەی بانکەکانەوە بێت.

ئەوەی پێویستە بیزانیت: ئەم هەنگاوەی یەکێتیی ئەوروپا بۆ ساڵی داهاتوو دەبێت، ئەمەش وەک ڕێگەیەک بۆ هاندانی حکومەتی عێراق بۆ پێشکەشکردنی هاوکاریی بە گەنجان و کەمکردنەوەی کۆچکردنی گەنجان بۆ دەرەوە.

بۆچی گرنگە: لەگەڵ کردنەوەی بانکی نیشتمان هاووڵاتیانی هەرێمی کوردستان لەم قەرزەوە و سەرجەم قەرز و پێشینەکان سوودمەند دەبن.