عێراق نەخشەڕێگای پڕۆگرامی ئاشتییانەی ئەتۆمی دادەڕێژێت

ئاڤا نیوز

سەرۆکوەزیرانی عێراق و سەرۆکی ئاژانسی نێودەوڵەتیی وزەی ئەتۆمی گفتوگۆ لەبارەی چۆنیەتی پەرەپێدان بە تواناکانی عێراق لە پڕۆگرامی ئاشتییانەی ئەتۆمیدا دەکەن.

چیرۆکی سەرەکی: ڕافائێل گرۆسی، سەرۆکی ئاژانسی نێودەوڵەتیی وزەی ئەتۆمی لە بەغدا لەگەڵ محەممەد شیاع سوودانی، سەرۆکوەزیرانی عێراق کۆبووەوە.

لێدوانی فەرمی: نەعیم عەبودی، وەزیری پەروەردەی عێراق کە یەکێک بووە لە بەشداربووانی کۆبوونەوەکە دەڵێت: "چەند پڕۆژەیەکمان لە عێراق تاوتوێ کرد، لەوانە بونیاتنانی ریئاکتۆرێکی ئەتۆمی بۆ مەبەستی ئاشتییانە." 

چاوەڕوانکراوەکان: لە ڕۆژانی داهاتوودا تیمێک لە شارەزایانی عێراق سەردانی بارەگای سەرەکیی ئاژانسی نێودەوڵەتیی وزەی ئەتۆمی لە ڤیەننا دەکات و لەوێ کار لە سەر داڕشتنی نەخشەڕێگای پڕۆگرامی ئەتۆمیی ئاشتییانە دەکەن.

باکگراوند: پێشتر عێراق سێ ڕیئاکتۆری ئەتۆمی لە ناوچەی تووەیسە لە باشووی بەغدا هەبوو. یەکێکیان ساڵی 1981 لە هێرشێکی ئاسمانیی ئیسرائیلدا وێران کرا و دووانەکەی دیکەش ساڵی 1991 لەلایەن ئەمریکاوە وێران کران.