دوای 13 ساڵ لە خۆپێشاندانی سووریا نیو ملیۆن كەس کوژراون

ئاڤا نیوز

 

13 ساڵ بەسەر دەستپێکردنی خۆپێشاندانی لە سووریادا تێدەپەڕێت، تاوەکو ئێستا نیو ملیۆن هاووڵاتی كوژراون و دەیان ملیۆنیش ئاوارەبوون.

 

وێنە گەورەكە: 13 ساڵ پێش ئێستا خۆپێشاندان لە سووریا دژی دەسەڵاتی "بەشار ئەسەد" دەستیپێكرد، دواتر خۆپێشاندانەكان گۆڕان بۆ شەڕ و پێكدادان و ناكۆكیی ناوخۆ وهێزی دەرەكی دەستیانخستە ناو سووریاوە، تاوەکو ئەمڕۆش سووریا شەڕی تێنەپەڕاندووە.

 

ژمارەکان وادەڵێن: ڕوانگەی سووری بۆ مافەکانی مرۆڤ ئامارێكی لەسەر دۆخی  مرۆیی سووریا بڵاوكردووەتەوە:

•    زیاتر لە 500 هەزار کەس  سووریاوە کوژراون، 164 هەزار كەس هاووڵاتیی مەدەنی بوون، لەنێویاندا 15 هەزار ژن و 25 هەزار منداڵی تێدایە.

•     تاوەکو ئێستا 343 هەزار شەڕکەر کوژراون کە پێکهاتوون لە چەکدارانی سوپای سووریا، گرووپە چەکدارەکانی نزیک لە ئێران، شەڕڤانانی کورد و چەکدارانی گرووپە ئۆپۆزسیۆنەکان.

 

لەلایەکی دیکەوە: نەتەوەیەکگرتووەکان دەڵێت: تەنیا لەمساڵدا 16 ملیۆن و 700 هەزار کەس کە دەکاتە سێ چارەگی دانیشتووانی سووریا پێویستیان بە هاوکاری مرۆییە و زیاتر لە %90ـی خەڵکی سووریا لەژێر هێڵی هەژارییەوە دەژین.

 

 زانیاریی زیاتر: بەپێی ئامارەکەی نەتەوەیەکگرتووەکان تەنیا لە ناوخۆی سووریا حەوت ملیۆن و 200 هەزار هاووڵاتیی سووریا بەهۆی شەڕەوە ئاوارە بوون.