توێژینەوەیەک: پێڵاوی دەرەوە لەناو ماڵ بەکارمەهێنن

ئاڤا نیوز

 

بەکارنەهێنانی پێڵاوی سەر شەقامەکان لە ماڵەوە هەندێکجار وەک هەڵبژاردنێکی کولتووری یان کەسی تەماشا دەکرێت، بەڵام توێژینەوەیەکی زانستی تیشک دەخاتە سەر نیشانە نەرێنییەکانی بۆ سەر تەندروستی مرۆڤ.

 

وێنە گەورەکە: پێڵاوی سەر شەقامەکان بەکتریا و ماددەی هەستیار و کیمیایی هەڵدەگرن کە زۆربەیان پەیوەندییان بە کێشەی تەندروستییەوە هەیە، توێژینەوەیەک جەخت لە بەکارنەهێنانی پێڵاوی دەرەوە بۆ کاری ناو ماڵ دەکاتەوە. هاوکات، ڕوونی دەکاتەوە بە ئەنجامدانی ئەم هەنگاوە ڕێگری لە بەرکەوتنی خێزانەکان بە میکرۆب و ماددە کیمیاییە زیانبەخشەکان بە شێوەیەکی بەرچاو کەمدەکاتەوە.

 

بڵاوکراوەی فەرمی: توێژینەوەیەک کە لە زانکۆی ئەریزۆنا لە ئەمریکا ئەنجامدراوە، دەریخستووە، پێڵاوەکان ڕێژەیەکی زۆری بەکتریا و میکرۆب لەسەر کۆدەبێتەوە، ئەم میکرۆبانەش دەبنە هۆی هەوکردنی قووڵی پێست، هەوکردنی سییەکان و تەنانەت هەوکردنی کوشندە لە سووڕی خوێن.

 

ئەوەی لەبارەیەوە دەگوترێت: لە توێژینەوەکەدا هاتووە، منداڵانی خوار تەمەن پێنج ساڵ ئەگەر دەستیان بەر ئەو پێڵاوانە بکەوێت و دەستیان بخەنەوە دەمیان کە ئەمە خویەکی باوی منداڵە لەو تەمەنەدا، ئەوە مەترسی لەسەر تەندروستیان دروست دەکات.