ئاڤا میدیا زانیاریی ورد لەسەر پرۆژەی ڕووناکی بڵاودەکاتەوە

ئاڤا نیوز

379 مۆلیدەی گەڕەکەکان بەهۆی پرۆژەی ڕووناکییەوە کوژێنراونەتەوە و هەڵگیراون، بەم زووانەش کارەکانی پرۆژەکە دەگاتە پارێزگاکانی دهۆک و هەڵەبجە.

وێنە گەورەکە: پڕۆژەی ڕووناكی کە مەبەستی لێی دابینکردنی کارەبای 24 کاتژمێرییە و دەبێت تاوەکو ساڵی 2026 کارەبای تەواوی هەرێمی کوردستان بکرێتە 24 کاتژمێری، پرۆژەکە لە بەشێکی 21 گەڕەکی هەولێر و 7 گەڕەکی سلێمانی جێبەجێکراوە.

ئەوەی پێویستە بیزانیت: زانیارییەکان لەبارەی پرۆژەی ڕووناکی کە مەبەست لێی کارەبای 24 کاتژمێرییە، بەم شێوەیەن:

٠ لەو گەڕەكانەی پڕۆژەی ڕووناكی دەیانگرێتەوە، لەمەولا لە پسوولەی یەكەم 50% داشكاندنیان بۆ دەكرێت، لە پسوولەی دووەمیش 25%، بۆ ئەوەی هاونیشتمانیان هەم هۆشیار بكرێنەوە و هەم لە تێگەیشتن لە پڕۆژەكە زەرەر نەكەن.

٠ بە پێی پێوەری نێودەوڵەتی، هەر مۆلیدەیەك هیندەی 173 ئۆتۆمبێلی بچووك دوانۆكسیدی كاربۆن (CO2) بڵاو دەكاتەوە، كەواتە لابردنی ئەم ڕێژەیەی مۆلیدەکان كە لابراون دەكاتە نزیكەی 60 هەزار 567 ئۆتۆمبێل.

ژمارەکان وا دەڵێن: داتاکانی تێكڕای پارەی كارەبا لە مانگی یەك و دوو كە وەرزی زستانە و خواست لەسەر كارەبا زۆرە، كەمبووەتەوە، بەم شێوەیە:

٠ لە گەڕەكی شادی كە هەژارنشینە، تێكڕای پارەی كارەبا لە مانگی یەكەم 87 هەزار دینار بووە، لە مانگی دووەم كەمبووەتەوە بۆ 75 هەزار دینار.

٠ لە گەڕەكی بەهاری نوێ، تێكڕای پارەی كارەبا بۆ مانگی یەك 97 هەزار دینار بووە، لە مانگی دوو كەمبووەتەوە بۆ 77 هەزار دینار.

٠ لە گەڕەكی بەختیاری، تێكڕای پارەی كارەبا بۆ مانگی یەك 178 هەزار دینار بووە، لە مانگی دوو كەمبووەتەوە بۆ 153 هەزار دینار.

٠ لە گەڕەكی نازناز كە دەوڵەمەندنشینە، تێكڕای پارەی كارەبا لە  مانگی یەك 182 هەزار دینار بووە، لە مانگی دوو زیادی كردووە بۆ 227 هەزار دینار بووە.