بانکی ناوەندی: عێراق لە کۆنترۆڵکردنی فرۆشتنی دۆلاردا یەکێک لە باشترین وڵاتەکانی جیهانە

ئاڤا نیوز

پارێزگاری بانکی ناوەندی، دووپاتی کردەوە کە عێراق بووەتە یەکێک لە باشترین وڵاتەکانی جیهان لە کۆنترۆڵکردنی فرۆشتنی دۆلاردا.

 

وێنە گەورەکە: لەدوای ساڵی 2003ەوە حکومەتی عێراق بە ئامانجی کۆنترۆڵکردنی نرخی دراو و هاوکاریکردنی هاووڵاتیانی کەمدەرامەت تا بتوان پێداویستییەکانیان دابین بکەن، دۆلاری بەشێوەی ڕاستەوخۆ بە بازرگانان دەفرۆشت تا کاڵا لە دەرەوە هاوردە بکەن، بەم دوایانەش ئەو ڕێکارە گوومانی چەندین دۆسیەی گەندەڵی و هاوردەکردنی کاڵای وەهمی و بەقاچاغبردنی دۆلاری بۆ وڵاتانی دراوسێ دروستکردبوو.

 

لێدوانی فەرمی: عەلی ئەلعەلاق، پارێزگاری بانکی ناوەندیی بە ئاژانسی فەرمیی عێراقی ڕاگەیاند: عێراق ئەمڕۆ بووەتە یەکێک لە باشترین وڵاتەکانی جیهان لە کۆنترۆڵکردنی فرۆشتنی دۆلاردا، بەو پێیەی ئەم پرۆسەیە بە شێوەیەکی شەفاف و ورد ئەنجام دەدرێت و لە ڕێگەی ئەوەوە هاووڵاتی بەڵگەنامەکانی پشتڕاست دەکاتەوە و وڵات بەجێدەهێڵێت.

 

- ئەم میکانیزمە بە شەفافترین و کۆنتڕۆڵکراوترین میکانیزم لە جیهاندا دادەنرێت، وەک پسپۆڕانی نێودەوڵەتی ئاماژەی پێدەکەن.

- هەواڵی هەڵە و شێواندنی میدیا ڕەنگە زیان بە بەرژەوەندییەکانی عێراق و کەرتی بانکی بگەیەنێت.

- حکومەت و بانکی ناوەندی زۆر کاردەکەن بۆ دامەزراندنی پراکتیکی دروست کە لەگەڵ ستانداردە نێودەوڵەتییەکان بگونجێت.