چیرۆک و ڕاستی و دروستی گونیە پارەکە؛ مووچەی مانگی 12 نێردراوە؟

ئاڤا نیوز

بڵاوبوونەوەی وێنەی فەردە پارەیەک لە میدیاکان و سۆشیاڵ میدیا کە ڕێکەوتی مانگی 12ی ساڵی 2024ی لەسەر نووسرابوو و کاردانەوەیەکی زۆری لێکەوتەوە، بۆ ئەم مەبەستە ئاڤا میدیا بۆ بەدواداچوونی بۆ بابەتەکە کرد و ڕاستییەکانی ئاشکرا کرد.

وێنە گەورەکە: لەسەر فەردەکە ڕێکەوتی 15-12-2024 و ناوی بانکی ناوەندیی عێراق نووسراوە، بەم هۆیەوە فەردە پارەکە دەنگدانەوەیەکی زۆری بەدوای خۆیدا هێنا و گوترا کە ئەو پارەیە هی مووچەی مانگی 12ی ساڵی 2024 و بەغدا ناردوویەتی، بەڵام حکومەتی هەرێمی کوردستان بۆ مانگی یەکی ئەمساڵ دابەشی دەکات.

زانیاریی تایبەت: ئاڤا میدیا بەدواداچوونی ورد و قوڵی بۆ بابەتەکە کرد و وێنەکی فەردەکەی بۆ بانکی ناوەندی نارد، بانکی ناوەندی بەم شێوەیە وەڵامی ئاڤای دایەوە:

- ئەم ڕێکەوتەی سەر فەردە پارەکە پەیوەندی بە ڕیزبەندی مووچە و مانگەوە نییە، بەڵکو ئێمە هۆڵێکی گەورەمان لە لقی هەولێری بانکی ناوەندییەوە هەیە کە تایبەتە بە پارە ژماردن.

- 40 فەرمانبەر تەنیا ئیشیان ژماردنی پارە و جەرد کردنییەتی، ئەو پارەیەی دەچێتە ئەو بانکە، ئەوان دەیژمێرن و دەیخەنە گونییەوە، کە ژماردیان سەری دادەخەن و ختمی لێ دەدەن، لەگەڵ ڕێکەوتی ئەو ڕۆژەی ژمێردراوە، ئینجا جۆر و بڕی پارەکەی لەسەر دەنووسن،بۆیە ئامادە دەکرێت بۆ ئەوەی بانک بەکاری بهێنێت، ئیتر دەخرێتە کۆگاوە تا ئیشیان پێی دەبێ.

ئەوەی پێویستە بیزانیت: ئەو گونیەیەی وێنەکەی بڵاوبووەتەوە، ڕێکەوتی 15-12-2024 ژمێردراوە، جۆری 25 هەزار دیناری بووە و بڕەکەی یەک ملیار دینار بووە. ئەم مانگە بۆ مووچە بە حکومەتی کوردستان دراوە.