شاندی هەرێمی کوردستان لەگەڵ وەزیری دارایی عێراق لە کۆبوونەوەدان

 

 ئاڤا نیوز

شاندی هەرێمی کوردستان لە بەغدا لەگەڵ تەیف سامی، وەزیری دارایی عێراق بۆ گفتوگۆ لەبارەی هەمواری خشتەکانی یاسای بودجەی گشتی عێراق بۆ ساڵی 2025 و چارەسەرکردنی ئاستەنگەکانی بەردەم مووچەی فەرمانبەران لە کۆبوونەوەدان.

وێنە گەورەکە: كێشەكانی ساڵی ڕابردووی نێوان هەولێر و بەغدا كەڵەكە بوون، هەموو ئەو ڕێککەوتنانەی پێشتر هەبوون لەبارەی مووچە تایبەت بوون بە ساڵی 2024، بۆیە پێویستە ڕێککەوتنێکی نوێ بکرێت، بەتایبەت ئێستا کێشە بۆ مووچەی مانگی یەک دروست بووە و هیچ بڕیارێک بۆ ناردنی نییە.

چیرۆکی سەرەکی: ڕۆژی یەکشەممە وەزارەتی دارایی و ئابووریی چوونی شاندی هەرێمی کوردستانی بۆ بەغدا لەبارەی هەمواری خشتەکانی یاسای بودجەی گشتی عێراق بۆ ساڵی 2025 و چارەسەرکردنی ئاستەنگەکانی بەردەم مووچەی فەرمانبەران ڕاگەیاند.

 

ئەوەی پێویستە بیزانیت: پێشتر ئاڤا ئەوەی بڵاو کردبووەوە کە شاندەکەی هەرێم لەگەڵ وەزیری دارایی کۆ دەبنەوە، شاندەکەش پێکدێن لە دوو تیم:

 

یەکەم: تیمی سیاسی کە پێکدێت لە  د.ئومێد سەباح، سەرۆکی دیوانی ئەنجوومەنی وەزیران، ئاوات شێخ جەناب، وەزیری دارایی و ئابووری، د.ئامانج ڕەحیم، سکرتێری ئەنجوومەنی وەزیران و د. عەبدولحەکیم خەسرۆ، سەرۆکی فەرمانگەی هەماهەنگی و بەدواداچوون.

دووەم: تیمی تەکنیکی کە هەر لەگەڵ ئەوانە، پێکدێت لە ڕێباز عەباس، ڕاوێژکار و بەڕێوەبەری نووسینگەی وەزیر، کۆڤان تەحسین، بەڕێوەبەری گشتیی ژمێرکاری، عەبدوڵڵا ڕەمەزان، بەڕێوەبەر لە بەڕێوەبەرایەتیی بودجە.