بەهۆی سکاڵای سوپای عێراق چەند جووتیار و هاونیشتمانییەکی کورد دادگایی دەکرێن

ئاڤا نیوز 

 

لەسەر سکاڵای سوپای عێراق 26 جووتیار و هاونیشتمانی کورد لە سنووری تۆپزاوا بانگهێشتی دادگەی تێهەڵچووونەوەی کەرکووک دەکرێن.

 

چیرۆکی سەرەکی: بڕیارە ئەمڕۆ یەکشەممە، دوو پارێزەری  26 جووتیار و هاونیشتمانی لەسەر سکاڵایەکی سوپای عێراق لە دادگەی تێهەڵچوونەوەی کەرکووک ئامادەبن، هاوکات سکاڵای سوپای عێراق ئەوەیە کە موڵکداریی بەشێکی زەوییەکانی سنوورەکە بۆ ئەوان دەگەڕێتەوە و "هاونیشتمانیان زیدەڕۆییان لەسەر زەوییەکانیان کردووە و دەبێت بدرێنە دادگە"، ئەمە لە کاتێکدایە تاپۆی زەوییەکان بەناوی کورد و تورکمانە.

زانیاریی بەدەستهاتوو: سەرچاوەیەک لە هاونیشتمانیانی گوندی تۆپزاوا بە ئاڤا نیوزی ڕاگەیاند، زیاتر لە 12 هاونیشتمانی کە سکاڵایان لەسەر تۆمارکراوە و دەچنە دادگای تێهەڵچوونەوەی کەرکووک، ئەوەشی خستەڕوو کە ئەوانە جووتیار نین و تەنیا دانیشتووی تۆبزاوان، بەڵام سوپای عێراق سکاڵای لەسەر تۆمار کردوون.

 

ئەوەی پێویستە بیزانیت: گوندی تۆپزاوا نزیکەی 12 هەزار دۆنم زەوییە، لەو ڕێژەیە چوار هەزار و 200 دۆنمی بە ناوی وەزارەتی بەرگریی عێراقە، لە دوایین جووڵەشیدا سوپا نزیکەی 300 دۆنم زەوی دەستبەسەردا گرتووە، هاوکات لە یەکێک لە سکاڵاکان داوای پێنج پارچە زەویی سنوورەکە دەکات کە 400 بۆ 500 دۆنم دەبێت، ئەمەش ناڕەزایەتی هاونیشتمانیانی سنوورەکەی لێ کەوتووەتەوە. 

 

زانیاریی زیاتر: لە ئەگەری یەکلاییبوونەوەی سکاڵاکە لە بەرژەوەندی سوپای عێراق، نزیکەی 40 ماڵ لە سنوورەکە دەبێت زێدی خۆیان بەجێبهێڵن، هاوکات هاونیشتمانییان ناڕەزایەتیی دەردەبڕن و دەڵێن: خێوەتی ناڕەزایەتیی هەڵدەدەین و دەست دەکەین بە خۆپیشاندان.