یەکەی نیشتەجێبوون بۆ زیندانییە سیاسییەکان و کەسوکاری شەهیدان دروستدەکرێت

ئاڤا نیوز

 

هەنگاوەکان بۆ دروستکردنی یەکەی نیشتەجێبوون بۆ کەسوکاری شەهیدان و جینۆساید و زیندانییانی سیاسی لە هەرێمی کوردستان دەستپێدەکات، قۆناغی یەکەمی پرۆسەکەش لە زاخۆوە دەستپێدەکات و ئێستا کار بۆ فراوانکردنی زەوی تەرخانکراو بۆ پرۆژەکە دەکرێت.

 

وێنە گەورەکە: بەبڕیاری سەرۆکوەزیران مەسرور بارزانی، یەکەی نیشتەجێبوون بۆ کەسوکاری شەهیدان، جینۆساید و زیندانییانی سیاسی قۆناغ بە قۆناغ لە هەموو ناوچەکانی هەرێمی کوردستان دەستپێدەکات، پرۆسەکەش ئەو خێزانانە دەگرێتەوە کە پێشتر لە وەرگرتنی یەکەی نیشتەجێبوون و زەوی سوودمەندنەبوون.

 

ئەوەی پێویستە بیزانیت: چەند ڕۆژێک لەمەوبەر لیژنەیەکی باڵا لە وەزارەتەکانی شەهیدان و ئەنفالکراوان و وەزارەتی شارەوانی و گەشتوگوزار، سەردانی ئەو زەوییانەیان کرد کە بۆ بوونیادنانی یەکەکان لە زاخۆ دابینکراون، دوای وردبینی لیژنەکە داوای فراوانکردنی ڕووبەری زەوییەکانیان کردووە.

 

لێدوانی فەرمی: ئیدریس عەبدوڵڵا، جێگری سەرۆکی شارەوانی زاخۆ بە ئاڤا میدیای ڕاگەیاند: لە سنووری زاخۆ 15 دۆنم زەوی ئامادەکرابوو بۆ پرۆژەکە، بەڵام وەزارەتی شارەوانی داوای دابینکردنی نزیکەی 25 دۆنم زەوی دەکات، ئێستا وردبینی بۆ تاپۆ و موڵکییەتی سێ شوێنی دیکە کراوە و دوای تەواوبوونی ڕێکارەکان ڕاستەوخۆ دەست بەدروستکردنی یەکەکان دەکرێت".

 

زانیاریی زیاتر: بەهۆی پشووەکانی سەری ساڵ، دروستکردنی یەکەکان دەکەوێتە ساڵی 2025 و لەلایەن دەزگای خێرخوازی بارزانی و دەستەی وەبەرهێنان دروستدەکرێت، بەشێکیشیان لەسەر بوودجەی حکومەتی هەرێمی کوردستان دەبێت.