ئەحمەد شەرع: پەیوەندیمان لەگەڵ قاعیدە بوو بەڕابردوو

ئاڤا نیوز

 

ئەحمەد شەرع پەیوەندی گرووپەکەی لەگەڵ قاعیدە بە ڕابردوو ناوزەند دەکات و دەڵێت ئێستا هیچ پەیوەندییەکمان لەگەڵ گرووپ و بەرەکانی دەرەوە نییە و کار بۆ سووریایەکی نوێ دەکەین.

 

وێنە گەورەکە: ساڵی 2013 تاوەکو ساڵی 2016 گرووپی تەحریرولشام کە ئەوکات ناوی بەرەی نوسرە بوو پەیوەندی بە ڕێکخراوی قاعیدەوە هەبوو، دواتر لەو ڕێکخراوە جیابوونەوە و لەگەڵ گرووپە چەکدارە ئۆپۆزیسیۆنەکانی دیکەی سووریا پەیوەندییان بەست و ساڵی 2017 ناوی گرووپەکەیان لە بەرەی نوسرەوە گۆڕی بۆ تەحریرولشام، دواتریش لە ڕۆژی 8-12-2024 تەحریرولشام بەهاوکاری گرووپە چەکدارە ئۆپۆزیسیۆنەکانی دیکەی سووریا توانییان دەسەڵاتی 53 ساڵەی بنەماڵەی ئەسەد لە سووریا بڕوخێنن و خۆیان دەسەڵاتی سووریا بگرنەدەست. 

 

لێدوانی فەرمی: ئەحمەد شەرع، سەرکردەی گشتیی ئیدارەی سووریای نوێ، لە نوێترین لێدوانیدا ڕایگەیاند، ئێستا بەپێی بەرژەوەندی خەڵکی سووریا کاردەکەین و هیچ پەیوەندییەکمان بە گرووپ و بەرەکانی دەرەوە نەماوە و پەیوەندیشمان لەگەڵ قاعیدە بووە بەڕابردوو. 

 

لەلایەکی دیکەوە: سەبارەت بە عێراقیش، ئەحمەد شەرع دەڵێت، ڕەتیدەکەینەوە لە شەڕێکی عێراقدا بەشداریمان کردبێت کە شەڕەکە بەرەو مەزهەبیبوون هەنگاوی نابێت.