سزای ئەو گۆرانیبێژەی پشتیوانی خۆپێشاندانەكانی ئێرانی كرد دەگۆڕێت

ئاڤا نیوز

دادگەی ئێران بڕیاریدا، بە گۆڕینی سزای زیندانیکردنی گۆرانیبێژ مەهدی یەراحیی، بۆ ساڵێک دەستبەسەرکردنی لە ماڵەوە، دوای ئەوەی بە گۆرانییەک پشتیوانی خۆپێشاندانەکانی ساڵی ڕابردووی ئێرانی کرد.

چیرۆکی سەرەکیی: مەهدی یەراحیی  تەمەن 42 ساڵ، گۆرانیبێژێکی ئێرانییە، دوای ئەوەی گۆرانییەکی بە ناوی " لەچکەکەت فڕێبدە" دەردەکات، وەک پاڵپشتییەک بۆ خۆپێشاندانەکانی " ژن، ژیان، ئازادیی"، لەلایەن ‌هێزە ئەمنییەکانەوە دەستگیردەکرێت و سزای زیندانیکردنی بەسەردا دەسەپێنرێت.

لێدوانی فەرمیی: پارێزەرەکەی مەهدی ڕایگەیاند: بەهۆی تێکچوونی دۆخی تەندرووستی یەراحیی و پێویستیی بە چارەسەری پزیشکیی، دادگا بڕیاریدا سزای زیندانیکردنەکەی بگۆڕێت بۆ  ساڵێک دەستبەسەرکردنی لە ماڵەوە.

زانیاريی زیاتر: ئەو بڕیارە لە 20ی شووباتەوە کاری پێدەکرێت، لەگەڵ سزای پێبژاردن بە بڕی 15 ملیار تومەنی ئێرانیی کە دەکاتە ( 356 هەزار دۆلاری ئەمریکی). 

باکگراوند: لە 28-8- 2023 مەهدی یەراحیی، بە تۆمەتی ئەوەی گۆرانییەکی نایاسایی، دژی ئەخلاق و دابونەریتی کۆمەڵگەی ئیسلامیی بڵاوکردووەتەوە سزانی دووساڵ و هەشت مانگ  زیندانی و لێدانی 74 قامچی، بەسەردا سەپێنرا.