حکومەتی عێراق بڕیاری لێبڕینی 1%ی مووچەی بۆ غەززە و لوبنان هەموار کردەوە

ئاڤا نیوز

حکومەتی عێراق بڕیاری لێبڕینی 1%ی مووچەی فەرمانبەرانی بۆ پشتیوانی غەززە و لوبنان هەموار کردەوە و ڕایگەیاند، بڕیاری لێبڕینی ئارەزوومەندانەی مووچە تەنها بۆ شەش مانگ دەبێت و لە مانگی داهاتووەوە دەستپێدەکات.

وێنە گەورەکە: ئەنجوومەنی وەزیرانی عێراق لە کۆبوونەوەی ئەمڕۆیدا کە بەسەرۆکایەتیی محەممەد شیاع سوودانی بەڕێوەچوو، گفتوگۆی لەسەر پرۆسەی سەرژمێریی کرد و ئەوەی ڕایگەیاند، پرۆسەکە سەرکەوتوو بوو لە بواری دەستکەوتنی ئامار و داتا بەشێوەی ئەلیکترۆنی و، ئاماژەی ئارامیی وڵات و سیستەمی سیاسی و هۆشیاری هاووڵاتیانی عێراقیشی نیشاندا، لە قۆناغی داهاتووشدا پرۆسەی سەرژمێریی بۆ هاووڵاتیانی عێراق لە دەرەوەی وڵات دەکرێت.

ئەوەی پێویستە بیزانیت: ئەنجوومەنی وەزیرانی عێراق بڕیارێکی پێشووی خۆی بۆ لێبڕینیی ئارەزوومەندانەی مووچەی فەرمانبەران بەڕێژەی 1% بەمەبەستی پشتیوانی لە گەلانی فەڵەستین و لوبنان هەموار کردەوە، بەجۆرێک بڕیارەکە تەنها بۆ شەش مانگ دەبێت و لە سەرەتای مانگی داهاتووەوە دەستپێدەکات، هاوکات بڕیاریشیدا 320 هەزار تۆن گەنم وەک هاوکاری بۆ گەلی لوبنان ڕەوانە بکرێت.

لەلایەکی دیکەوە: ئەنجوومەنی وەزیران لە بڕیارێکی دیکەیدا، بەشی ئیدارەی فڕۆکەخانەکانی عێراقی لە کۆمپانیای گشتی بۆ بەڕێوەبردنی فڕۆکەخانەکان و گەشتی ئاسمانی جیا کردەوە و وەک بەڕێوەبەرایەتییەکی ڕاستەوخۆ بە وەزارەتی گواستنەوەی بەستەوە.