ئەکسیۆس: ترەمپ تاوتوێی شەڕی غەززە و لوبنانی لەگەڵ وەزیرێکی ئیسرائیل کردووە

ئاڤا نیوز

ماڵپەری ئەکسیۆسی ئەمریکی بڵاویکردەوە، وەزیرێکی ئیسرائیل لەگەڵ دۆناڵد ترەمپ، سەرۆکی هەڵبژێردراوی ئەمریکا کۆبووەتەوە و باسیان لە شەڕی غەززە و لوبنان کردووە.

 

وێنە گەورەکە: دۆناڵد ترەمپ، کاندیدی کۆمارییەکان لە هەڵبژاردنی سەرۆکایەتیی ئەمەریکا، توانی سەرکەوتن بەسەر کامالا هاریسی ڕکابەری تۆمار بکات و جارێکی تر ببێتەوە بە سەرۆک، دوای ئەوە ماوەی چەند ڕۆژێکە پەیوەندی و گفتوگۆی لەگەڵ سەرۆک و کاربەدەستی وڵاتان دەستپێکردووە. 

 

بڵاوکراوەی فەرمی: بە گوێرەی ئەو هەواڵەی کە ماڵپەری ئەکسیۆسی ئەمریکی بڵاویکردووەتەوە:'' دۆناڵد ترەمپ لەگەڵ ڕۆن دێرمر، وەزیری کاروباری ستراتیژی ئیسرائیل کۆبووەتەوە، هاوکات باسیان لە پرسە تایبەتەکانی سەبارەت بە شەڕی غەززە و لوبنان کردووە، لەگەڵ ئەوەشدا ترەمپ ئەو کارانەی کە دەیەوێت ئیسرائیل کاریان لەسەر بکات یان نەکات پێش دەستبەکاربوونی پێێ ڕایگەیاندووە''.

 

زانیاریی بەدەستهاتوو: هەر بە گوێرەی زانیارییەکان، وەزیرەکەی ئیسرائیل لە میانەی کۆبوونەوەکەدا پلانی دوو مانگی داهاتووی وڵاتەکەی بۆ شەڕی غەززە و لوبنانی بە ترەمپ ڕاگەیاندووە. 

 

زانیاریی زیاتر: سەرۆکی تازە هەڵبژێردراوی ئەمریکا ئێستا خەریکی ڕێکخستنەوە و پێکهێنانی کابینەی نوێی سەرۆکایەتییەکەیەتی و بڕیارە لە 20-1-2025 دەستبەکار بکات، لە ئێستاوە چاوەکان لەسەر ترەمپن بۆ یەکلاکردنەوەی شەڕی غەززە و لوبنان هاوکات جەنگی نێوان ڕووسیا و ئۆکراینا.