بەغدا پێشوازیی لە دووەمین کۆبوونەوەی چوارقۆڵی پڕۆژەی ڕێگەی گەشەپێدان دەکات

ئاڤا نیوز

لە بەغدا دووەمین کۆبوونەوەی چوار قۆڵی نێوان وەزیرانی گواستنەوەی عێراق، تورکیا، قەتەر و ئیمارات سەبارەت بە رێگەی گەشەپێدان بەڕێوەدەچێت.

 

 وێنە گەورەکە: پڕۆژەی ڕێگەی گەشەپێدان لە چوارچێوەی ئەو یاداشتە 26 خاڵییەی نێوان  بەغدا و ئەنقەرەیە کە لە 22ـی نیسان لە دوای سەردانەکەی ڕەجەب تەیەب ئەردۆغان، سەرۆککۆماری تورکیا بە بەشداری قەتەر و ئیمارات لە بەغدا واژۆ کرا. 

 

زانیاریی بەدەستهاتوو: میدیای فەرمی عێراق ڕایگەیاند: ئەمڕۆ پێنجشەممە 31-10-2024، لە بەغدا دووەمین کۆبوونەوەی چوار قۆڵی نێوان وەزیرانی گواستنەوەی عێراق، تورکیا، قەتەر و ئیمارات سەبارەت بە رێگەی گەشەپێدان بەڕێوەدەچێت.

 

ناوەڕۆکی کۆبوونەوەکە: لە کۆبوونەوەکەی ئەمڕۆدا باس لەو ئەنجامانە دەکرێت کە لیژنە تەکنیکیەکان لە کۆبوونەوە و دیدارەکانی پێشوویاندا پێی گەیشتبوون، بۆ ئەوەی بتوانرێت لەسەر ئەرزی واقیع جێبەجێ بکرێن. ئەمەش دوای تەواوبوونی قۆناغی سەرەتایی دیزاینی هێڵی شەمەندەفەر، هاوکات دوای تەواوبوونی ڕووپێوی تۆپۆگرافی و لێکۆڵینەوە لە پێکهاتەی خاکەکەو کارکردن لەسەر ئامادەکردنی دیزاینی ڕێگای خێرای وشکانی.

 

خاڵە ئەرێنییەکان: ئەو پڕۆژەیە بۆ گەورەکردنی قەبارەی بازرگانی ئەو چوار وڵاتەیە، لە هەمان کاتدا ڕێگای بازرگانیی نێودەوڵەتی نێوان تورکیا، ئاسیا و ئەوروپا دروست دەکات، ڕێگەیەکی پارێزراوی بازرگانی بوونیاد دەنێت.