دادگای فیدراڵی سەرجەم کورسی کۆتاکانی لە پەرلەمانی کوردستان هەڵوەشاندەوە

ئاڤا نیوز


دادگای فیدراڵی عێراق 11 کورسی کۆتاکانی کریستیان، تورکمان و ئەرمەنی لە پەرلەمانی کوردستان هەڵوەشاندەوە و ژمارەی کورسییەکانی بۆ 100 کەمکردەوە.

چیرۆکی سەرەکی: دوای 15 جار دادبینی و دواخستن، ئەمڕۆ چوارشەممە دادگای فیدراڵی عێراق پرسی هەڵبژاردنی پەرلەمانی کوردستانی یەکلاکردەوە و کۆتایی بەم مشتومرە هێنا.

لێدوانی فەرمی: جاسم محەممەد، سەرۆکی دادگای فیدراڵی عێراق لە کۆنگرەیەکی ڕۆژنامەوانیدا ڕایگەیاند: "دەبێت هەڵبژاردنی پەرلەمانی کوردستان بەشێوەی بازنەیی بێت، بە جۆرێک لە چوار بازنە کەمتر نەبێت". واتە بۆ هەر پاریزگایەک بازنەیەک دەبێت، هەولێر، سلێمانی، دهۆک و هەڵەبجە.

دادگای فیدراڵی سەرجەم کورسی کۆتاکانی هەڵوەشاندەوە و ڕایگەیاند نادەستوورییە، بەمشێوەیە ژمارەی کورسییەکانی پەرلەمانی کوردستان لە 111 کورسییەوە بۆ 100 کورسی کەمکرایەوە.

دادگای فیدراڵی یاسای هەڵبژاردنی پەرلەمانی کوردستانی بە نادەستووری لەقەڵەمدا و بڕیاری دا بە یاسای هەڵبژاردنی پەرلەمانی عێراق هەڵبژاردن بکرێت و کۆمسیۆنی سەربەخۆی هەڵبژاردنەکانی عێراقیش سەرپەرشتی بکات.

زانیاریی زیاتر: بەپێی بڕیارەکەی دادگای فیدراڵی عێراق، پێویستە هەموو قەوارەیەکی سیاسی لە هەرێمی کوردستان لیستی تایبەتی خۆی بە ناوی کاندیدەکانەوە پێشکەش بکات، بە مەرجێک ڕێژەی ئافرەتان لە 30% کەمتر نەبێت.