د. ئومێد سەباح: تاوەكو ئێستا 84 هەزار مووچەخۆر ماون بایۆمەتری بكەن

ئاڤا نیوز

 

یەکێک لە تێبینییەکانی بەغدا لەسەر لیستی مووچەی مووچەخۆرانی هەرێمی کوردستان، پڕۆسەی بایۆمەتری مووچەخۆرانی هەرێمی کوردستانە، کە تەنیا %7.56ـی ڕێژەی مووچەخۆران ماون بایۆمەتری بکەن و بڕیارە تا کۆتایی ئەمساڵ سەرجەمیان ئەو پڕۆسەیە جێبەجێ بکەن.

 

وێنە گەورەکە: شاندی بەغدا لە کۆبووەنەوەی هەفتەی ڕابردوویان لەگەڵ شاندی هەولێر، سێ تێبینیان لەسەر لیستی مووچەی مووچەخۆران هەبوو، لەوانە: بایۆمەتری، ناوی دووبارە و بوونی ناوی کۆمەڵێک فەرمانبەری سەر بە حکومەتی هەرێمی کوردستان  کە لە نێو لیستەکان شوێنی کارکردنیان لە ناوچە کوردستانییەکانی دەرەوەی ئیدارەی هەرێمی کوردستانە, شاندی هەرێمی کوردستان چارەسەری ئەو تێبینیانەی لایە و لەگەڵ خۆی دەیباتە بەغدا.

 

لێدوانی فەرمی: د. ئومێد سەباح، سەرۆکی دیوانی ئەنجوومەنی وەزیران لە گەشتی 07:00ـی شەوی یەکشەممەی هەوراز گوڵپی لە ئاڤا بەشداریکرد و  گوتی، " لە کۆی ملیۆنێک و 114 هەزار مووچە خۆری هەرێمی کوردستان، تاوەکو ئێستا 84 هەزار کەس ماوە بایۆمەتری بکەن، پرۆسەکەش بەردەوامە."

 

زانیاریی زیاتر: سەرۆکی دیوانی ئەنجوومەنی وەزیران گوتیشی، "لەگەڵ بەغدا گەیشتینە ئەو ڕێککەوتنە کە هەموو ئەو مووچانەی بڕاون بۆ مووچەخۆران بیگەڕێنینەوە و مووچەی مانگی هەشت گەرەنتی دەبێت."

 

چارەسەرەکان چین؟ شاندی هەرێمی کوردستان بەڕوونی داتاکانی خستووەتە بەردەم شاندی بەغدا هەرسێ تێبینییەکە بە چارەسەرەوە خراونەتەڕوو.

سەبارەت بە بایۆمتری، لە کۆی ملیۆنێک و 200 هەزار مووچەخۆری هەرێمی کوردستان تەنیا 84 هەزار مووچە ماون بایۆمتری بکەن و تا کۆتایی ئەمساڵ پێویستە سەرجەمیان لەنێو ئەو پڕۆسەیە تۆماربکرێن. ئەو ناوانەی کە بەغدا گومانی دووبارەبوونەوەی هەیە، لە ڕێگەی ناوی چواری و ناوی دایکەوە لەسەر ئەو وردەکاریانە هەردوولا گەیشتوونەتە ڕێککەوتن.

لەبارەی پرسی دوو مووچەی فەرمانبەرانی ناوچەکانی دەرەوەی ئیدارەی هەرێمی کوردستان، مووچەی فەرمانبەرانی کەرکووک؛ هەولێر و بەغدا لەسەر ئەوە ڕێککەوتوون لیستەکانیان پێبدەن، بەغدا لە وەزارەتەکانی دیکە بەدواداچوون دەکات بۆ ئەوەی بزانن دوو مووچە وەردەگرن یان نا.