دیاردەیەکی دەگمەن لە هیندستان؛ خوێن لەبری فرمێسک

ئاڤا نیوز

 

لە دیاردەیەکی دەگمەندا، لە هیندستان  مێرمنداڵێك کاتێک دەگریێت لەبری فرمێسک خوێن بە چاوانیدا دێتە خوارەوە، ئەمەش پزیشكەكانی تووشی شۆك كردووە.

 

چیرۆکی سەرەکی: بەگوێرەی ڕۆژنامەی "زە سەن"ی بەریتانی كە پشتی بە بڵاوكراوەیەكی زانستیی گۆڤاری "بی ئێم جی كەیس ریپۆرتس- BMJ Case Reports"  بەستووە، لە شاری بەنگالۆری وڵاتی هیندستان حاڵەتێكی دەگمەن تۆماركراوە؛ مێرمنداڵێك لە كاتی گریاندا فرمێسكی خوێناوی لە چاوییەوە دەڕژێت.

زانیاریی زیاتر: سەرچاوەكە باسی لەوەشكردووە کەسووکاری منداڵەکە تێبینی ئەوەیان كردووە خوێن لە چاوی ڕاست و كونەلوتی ڕاستی کوڕەکەیان دەردێت و دوای دوو هەفتەش بەسەر تێپەڕبوونی ئەو ڕووداوە، منداڵەکەیان پیشانی پزیشکی پسۆڕ داوە.

کایگەری و لێکەوتەکان: پزیشكەكان لە ڕاپۆرتەكانیاندا ئاماژەیان بەوە كردووە كە فرمێسكە خوێناوییەكان "بێ ئازارن" بەڵام "وردە وردە ئازارەكەی زیاد دەبێت" و منداڵەكە سەرەڕای هەبوونی ئەو دۆخەش، بینایی باشە.

پێدراوە ڕاستییەکان: بە گوێرەی راپۆرتە زانستییەكە؛ سەیرترین بەشی كەیسی مێرمنداڵە هیندییەكە ئەوەیە، لە كاتی میزكردندا باری تەندروستی خراپتر دەبێت و هەروەك پزیشكەكان ئاماژەی پێ دەكەن "داوامان لە نەخۆشەكە كردووە میز بكات و لە كاتی میزكردندا خوێنبەربوونێكی ئاشكرا لە چاوی ڕاستییەوە بەدی دەکرێت".

هۆکارە زانراوەکان: دوای پشکنین زیاتر دەرکەوتووە ئەو مێرمنداڵە، دەمارەکانی خوێنی دووچاری شێواوی بوون،  کە نەخۆشییەكە پەیوەندی بە تێکچوونی خوێنبەرەکانەوە هەیە.

ئەوەی پێویستە بیزانیت: تێکچوونی دەمارە خوێنبەرەكان كاتێك ڕوودەدەن كە ژمارەیەك بۆڕی خوێن لە جەستەدا بە هەڵە دروست دەبن.