زیانلێكەوتووانی بازاڕەكانی لەنگە و شێخەڵڵای هەولێر هاوكاری دەكرێن

ئاڤا نیوز 

 

دوای دابەشكردنی هاوكاریی دارایی سەرۆكوەزیران بارزانی بە زیانلێكەوتووانی بازاڕی قەیسەری هەولێر، زیانلێكەوتووانی لەنگە و شێخەڵڵاش هاوكاری دەكرێن.

 

وێنە گەورەکە: ڕۆژی 08-04-2024، بۆ دووەمجار لە ماوەی کەمتر لە دوو مانگدا، ئاگر لە بازاڕی لەنگەی هەولێر کەوتەوە و نزیکەی 50 دووکان سووتان، هاوكات ئاگر لە بازاڕی شێخەڵڵای شارەكەش كەوتەوە و ژمارەیەک دووكان سووتان.

 

زانیاریی بەدەستهاتوو: دوێنێ یەكشەممە، لەڕێوڕەسمێكدا هاوكاریی دارایی سەرۆكوەزیران بارزانی بە زیانلێكەوتووانی بازاڕی قەیسەریی هەولێر درا، هاوكارییەكەی لە 2 تا بیست ملیۆن دینار بوو، ئەمە سەرەڕای ئەوەی بۆ ماوەی یەك ساڵ لە پارەی ئاو و كارەبا و تابلۆ و خاشاک بەخشراون، هاوكات لە باجی ساڵی 2023 بە رێژەی 50% و لە باجی ساڵی 2024 یش بە رێژەی 100% بەخشراون.

 

زانیاریی تایبەت: بەپێی زانیارییەكانی ئاڤا نیوز، لە ڕۆژانی داهاتوو هاوكاریی دارایی سەرۆكوەزیران بارزانی بە زیانلێكەوتووانی هەردوو بازاڕی لەنگە و شێخەڵڵا بە بڕی 2 ملیۆن دینار دەدرێت هاوكات ماوەی ساڵێک لە باج و پارەی ئاو و كارەبا و تابلۆ و خاشاک دەبەخشرێن.