تورکیا لە هاوردەکردنی کاتژمێری سویسری پێشەنگە

ئاڤا نیوز

 

لەماوەی حەوت مانگی یەکەمی ئەمساڵدا، تورکیا بەبڕی 170.1 ملیۆن دۆلار کاتژمێری لە سویسرا هاوردە کردووە و پێش وڵاتانی ئەوروپی و عەرەبی کەوتووە.

 

چیرۆکی سەرەکی: بەپێی زانیارییەکانی ماڵپەڕی فەرمی فیدراسیۆنی پیشەسازیی کاتژمێری سویسرا، لە ماوەی نێوان مانگی یەک تاوەکو حەوتی ئەم ساڵ، تورکیا بە بەهای 170.1 ملیۆن دۆلار کاتژمێری هاوردە کردووە.

 

لەلایەکی دیکەوە: بەپێی ڕاپۆرتی ڕۆژنامەی ئۆکسیجن، لە حەوت مانگی یەکەمی ئەمساڵ، تورکیا لە هاوردەکردنی کاتژمیری سویسری پێش وڵاتانی کەنەدا، نەمسا، ئێرلەندا، بەلجیکا، قەتەر، کوەیت و بەحرەین کەوتووە ، لەکاتێکدا داهاتی تاک لەم وڵاتانە زیاترە بەراورد بە داهاتی تاک لە تورکیا.

 

زانیاریی زیاتر: قەبارەی هەناردەکانی کاتژمێر بۆ دەرەوە لە ماوەی حەوت مانگی یەکەمی ئەمساڵ لە سویسڕا دابەزیوە و قەبارەکەی گەیشتۆتە 15 ملیار و 159 ملیۆن فرانکی سویسری، بەراورد بە هەمان ماوەی ساڵی ڕابردوو بە ڕێژەی 2.4% دابەزینی تۆمار کردووە.

 

ئەمەش بزانە: سەرەڕای کەمبوونەوەی هەناردەکان، بەڵام هێشتا سویسرا بە هەناردەکردنی 16.9 ملیۆن کاتژمێری دەستی لە ساڵی 2023ـدا پلەی یەکەمی هەیە لە هەناردەکاری کاتژمێر لە جیهاندا، بەرهەمهێنەرانی سویسری بڕی 25.5 ملیار فرانک (30 ملیار دۆلار) سەرمایەی بیانییان راکێشاوەتە وڵاتەکەیان. بەمشێوەیە، تێکڕای نرخی هەناردەکردن بۆ هەر کاتژمێرێک بە هەزار و 775 دۆلار دیاری دەکرێت.