هەولێر و بەغدا لەبارەی لیستی مووچەخۆران ڕێکدەکەون

ئاڤا نیوز

 

پەرلەمانتارێكی كورد ئاشكرای دەكات كە ئەو تێبینییانەی چاودێریی دارایی عێراق لەسەر لیستی مووچەخۆرانی هەرێمی كوردستان هەیبوو چارەسەر كرا.

 

چیرۆكی سەرەكی: بۆ چارەسەركردنی گرفتی مووچەی فەرمانبەرانی هەرێمی كوردستان، ڕۆژی سێشەممە 27-8-2024، شاندێکی وەزارەتی دارایی گەیشتە بەغدا و لە سێ ڕۆژی ڕابردوو چەند كۆبوونەوەیەكیان لەگەڵ بەرپرسانی حكومەتی عێراق کردووە.

 

لێدوانی فەرمی: ئامانج هەركی، پەرلەمانتاری كورد لە پەرلەمانی عێراق بە ئاڤا نیوزی ڕاگەیاند: ئەنجامی كۆبوونەوەكانی شاندی هەرێمی كوردستان لەگەڵ وەزارەتی دارایی عێراق ئەرێنییە و هەردوولا ڕێككەوتوون لەسەر چارەسەركردنی ئەو تێبینیانەی كە لەنێو لیستی مووچەی مووچەخۆرانی هەرێمی كوردستان هەیە و لیستەكە جارێكی دیكە وردبینی كرا.

 

خاڵی ئەرێنی: بەپێی گوتەی ئەو پەرلەمانتارە، دیوانی چاودێریی دارایی عێراق تێبینی لەسەر ناوەكانی لیستی مووچەخۆران هەبووە و لە چوارچێوەی كۆبوونەوەكاندا بە ڕێككەوتن چارەسەر كراوە.