کارێکی جیاواز بۆ شەقامی ئیسکانی هەولێر دەکرێت

ئاڤا نیوز  

بەڕێوەبەرایەتی ئەندازەی پارکەکانی هەولێر، 200 داریان لە شەقامی ئیسکانی هەولێر چاندووەو دەڵێن دوای ماوەیەکی کەم ئەو شەقامە دەبێتە یەک پارچە سەوزایی.

وێنە گەورەکە: شەقامی ئیسکانی هەولێر، یەکێکە لە شەقامە قەرەباڵغەکانی هەولێر کە بۆماوەی 20 کاتژمێر جوڵە و سەردانی هاونیشتیمانیان و گەشتیارانی لێ ناوەستێت.

لێدوانی فەرمی: سەروەر وەیسی، بەڕێوەبەری ڕاگەیاندنی ئەندازەی پارکەکانی هەولێر بە ئاڤا نیوزی ڕاگەیاند: چەند ساڵێک لەمەوبەر دەیان دارمان لەو شەقامە چاند، بەڵام بەشێک لە دووکاندارەکان هۆکاربوون بۆ وشکبوونی بەشی زۆری دارەکان، چونکە بەشێکیان ڕۆنی قرچاوەی خواردنیان دەخستە ژێر دارەکان و بەو هۆیەوە وشک دەبوون.

زانیاریی زیاتر: سەروەر وەیسی دەڵێت: ئەمجارە میکانیزمێکی نوێمان گرتووەتەبەر، بە دووکاندارەکانمان گوتووە هەر دارێک کە دەیچێنین وشک بکات، دووکاندارەکە ناچار دەکەین لەبری دارێک سێ داری هاوتەمەنی ئەو دارە لەبەردەم دووکانەکەی بچێنێت.

ئەوەی پێویستە بیزانیت: بەڕێوەبەرایەتی ئەندازەی پارکەکان 200 داری جۆری ئەلبیزیا و سیسەمی لەشەقامی ئیسکان چاندووە،  بەگوتەی سەروەر وەیسی داری ئەلبیزیا تا پێنج مەتر درێژ دەبێت، بەمجۆرە ماوەیەکی دیکە دارەکانی شەقامی ئیسکان چوار وەرزە سەوز دەبن و سیمایەکی جیاواز دەبەخشێتە ئەو شەقامە.