مانگی حەوتی ئەمساڵ 350 دۆنم ڕووبەری گۆیژە و ئەزمەڕ سووتاوە

ئاڤا نیوز 

گوتەبێژی دارستان و ژینگەی سلێمانی ڕایگەیاند، ژمارەیەکی زۆر دار سووتاوە کە تەمەنیان لەنێوان یەک ساڵ تا 70 ساڵە.

وێنە گەورەکە: ڕووداوەكانی ئاگركەوتنەوە لە ماوەی چەند ڕۆژی ڕابردوودا لە سلێمانی و بەدیاریكراوی لە گۆیژە و ئەزمەڕ زیادیانكردووە، ئەمەش زیانی بە ژینگەی ناوچەكە گەیاندووە و ناڕەزایشی لێكەوتووەتەوە، پۆلیس و لایەنە پەیوەندیدارەكان دەستیان بە لێكۆڵینەوە كردووە.

لێدوانی فەرمی: عەقید هێمن کەمەرخان، گوتەبێژی دارستان و ژینگەی سلێمانی بە ئاڤا نیوزی گوت: لە مانگی حەوت دا ڕووبەری 350 دۆنم لە گۆیژە و ئەزمەڕ سووتاوە، بەوهۆیەوە ژمارەیەکی زۆر لە دارەکان سووتاون.

ئەوەی پێویستە بیزانیت: ئەو دارانەی سووتاون تەمەنیان یەک ساڵ، 20 ساڵ، 50 ساڵ، 70 ساڵ دەبێت.

لە لایەكی دیكەوە: دوێنێ ئاوات محەممەد، قایمقامی سلێمانی ڕایگەیاند: تاوەكو ئێستا نازانین هۆكاری ئەم ئاگرانە چییە، بەڵام لە ماوەی چەند ڕۆژێكدا چوار تا پێنج ئاگر لە سنوورەكە كەوتووەتەوە، ئەمەش گومانی دروست كردووە، بەڵام تاوەكو ئێستا ناتوانین بڵێین دەستی ئەنقەستە.